“Биз ўтиш вақти президенти билан ўтиш кенгаши ташкил этмоқчимиз. Биз бу ўтишни бошлаш учун фуқаролик жамияти, мухолиф партиялар, сиёсий кўпчилик, бутун дунё билан алоқада бўлиб турибмиз”, деб маълум қилган қўзғолончилар вакили полковник Исмоил Ваг.
Аввалроқ Малида ҳарбийлар томонидан пойтахт Бамако яқинидаги ҳарбий базада қўзғолон кўтарилган. Унинг давомида ҳарбийлар президент Иброҳим Бубакар Кейта ва бош вазир Бубу Сиссени ҳибсга олишган. Кейинроқ президент истеъфога чиқишини ва парламент ҳамда ҳукумат тарқатилиб юборилишини эълон қилган.
Ҳарбийлар мамлакатда умумий сайловларга олиб келувчи сиёсий ўзгаришларни амалга оширишга чақиришган, чегаралар ёпилиши ва комендантлик соати киритилишини эълон қилишган.
