«Менга 2017 йил туман ҳокими қарори билан 10 сотихдан зиёдроқ ер музлаткич қуриш учун доимий фойдаланишга ажратилган эди. Лойиҳам 2018 йил давлат дастурига ҳам киритилган бўлиб, сиғими 300 тонналик музлаткични ўша йили ишга туширдим. Бунинг учун ўғилларим, бошқа қариндошларим билан бирга йиллар давомида хорижда ишлаб пул тўплагандик.
Шу тарзда 650 миллион сўм сарфлаб қурган, бир неча йил ишлатган музлаткичим ўрни тўсатдан сотилиб кетибди. Яқинда бошқа бир тадбиркор келиб: «Энди бу ерлар меники», дея маълум қилди.
Айтишича, у музлаткичим ўрнини, унга кирадиган йўлларни, атрофдаги ерлар билан қўшиб аукционда сотиб олган экан. Қўлимда шунча ҳужжатим бўла туриб, қонунни бузмасдан ҳам бор-бисотимдан айрилишим мумкин экан-да?» – дейди Сайфулла Ҳайитов.
Дарвоқе, биз тадбиркор билан унинг музлаткичи биносида суҳбатлашиш учун унинг қўшниси ҳовлисидан ўтишга мажбур бўлдик. Чунки ҳақиқатан ҳам бу бинога бориладиган йўл сотиб юборилгани учун янги эгаси йўл устидан девор ва дарвоза қўйиб қулфлаб ташлаган. Биз ҳатто мазкур йўлни суратга олиш жараёнида ҳам уни сотиб олган тадбиркорнинг эътирозига дуч келдик.
Шу ерда содир бўлган бир кичик ҳолат эътиборимизни тортди. Юқорида йўлдан ҳам айрилган музлаткич эгасининг ўз биносига кириш учун қўшнисининг еридан кесиб ўтишини айтгандик. Мутлаткич ҳудуди ва атрофларининг янги эгаси эканини айтаётган тадбиркорнинг ана ўша қўшни билан суҳбатига гувоҳ бўлдик: «Мен сизга нима дегандим? Нима учун буларни ҳовлингиздан ўтказяпсиз?!»
Англашиладики, бу ҳудудларни сотиб олган «Шоҳрух Абдурашид Ҳамкор» ишлаб чиқариш таъминот корхонаси энди Сайфулла Ҳайитовни наинки асосий йўлдан музлаткичига ўтгани қўймайди. Шу билан бирга, бошқа – учинчи, бегона одамнинг еридан бўлса ҳам ўз биносига ўтишига йўл қўймайди...
Бу билан нима мақсад кўзланганини биз тушунишга ожизлик қилдик. Ҳарҳолда, биносига кира олмаётган Сайфулла Ҳайитовнинг 650 миллион сўмлик музлаткичига кира олмай, охир-оқибат уни арзон гаровга сотиб кетишини кўзламагандир?
