Дунё бўйлаб очарчиликдан азият чекаётганларга озиқ-овқат етказиб берадиган БМТнинг инсонпарварлик ташкилоти - Бутунжаҳон озиқ-овқат дастури (World Food Programme (WFP) 2020 йилги Нобел тинчлик мукофоти соҳиби деб топилди. Норвегия парламенти томонидан аъзолари тайинланадиган Норвегия Нобел қўмитаси шундай қарорга келди.

Қарорга кўра, WFP «очлик билан курашиш борасидаги саъй-ҳаракатлари, можаролардан зарар кўрган ҳудудларда яшаш шароитларини яхшилашга қўшган ҳиссаси ҳамда уруш ва можароларда очарчиликни қурол сифатида ишлатмасликнинг ҳаракатлантирувчи кучи сифатидаги ишлари учун» мукофотга сазовор бўлди. 

«Бу йилги мукофот билан Норвегия Нобел қўмитаси дунёнинг эътиборини очарчиликдан азият чекаётган ёки очарчилик хавфига дуч келган миллионлаб одамларга қаратишни хоҳлайди», - дейилади қўмита хабарида. 

Қўмита 2020 йилда бутун дунёга тарқалган COVID-19 коронавирус инфекцияси шароитида қатор минтақаларда очарчилик хавфи кучайганлигини таъкидлади. 

Аввалроқ Россия президенти Владимир Путин, АҚШ президенти Доналд Трамп ва унинг бўлажак сайловлардаги рақиби Жо Байден, россиялик мухолифатчи Алексей Навалний ва бошқаларнинг тинчлик бўйича Нобел мукофотига номзод сифатида кўрсатилиши ҳақида хабарлар тарқалган эди. 

Ўтган йили Нобел тинчлик мукофоти Эфиопия бош вазири Абий Аҳмад Алига «тинчлик ва халқаро ҳамкорликка эришиш йўлидаги саъй-ҳаракатлари, хусусан, қўшни Эритрея билан чегара можаросини ҳал қилиш бўйича қатъий ташаббуси учун» берилди. 

2020 йилда Нобел мукофотининг миқдори ўтган йилга нисбатан 1 миллион швед кронасига кўпайтирилиб, 10 миллионга етказилди (1,12 миллион доллар).  

2020 йилда Нобел ҳафталиги тиббиёт бўйича мукофот ғолиблари эълон қилинган 5 октябр кунидан бошланди. У гепатит C вирусини аниқлаган америкалик олимлар Чарлз Райс ва Ҳарви Олтер ҳамда британиялик Майкл Ҳоутонга берилди. Бу касалликни даволаш ва қон қуйиш орқали унинг тарқалишининг олдини олишга ёрдам бўлди. 

6 октябр куни қора туйнуклар устида ишлаганлиги учун физика бўйича мукофот ғолиблари эълон қилинди. Британиялик Рожер Пенроуз мукофотнинг ярмини «қора туйнукларнинг пайдо бўлиши умумий нисбийлик назариясининг ишончли тасдиғи» эканлигига, америкалик Райнҳард Генцел ва Андреа Гез эса «галактика марказида супермассив ихчам объект топилганлиги» учун лауреатга айланди. 7 октябр куни кимё бўйича Нобел мукофоти «генетик қайчи» ишлаб чиққан америкалик Женнифер Дудна ва франциялик Эммануэл Шарпантега топширилгани маълум бўлди.