Бартомеунинг кутилмаган пайтдаги кутилган истеъфоси. Аслида нима сабаб бўлганди?

Нима бўлди?

Жозеп Бартомеунинг истеъфоси – бошқарув муддати якунланмасдан туриб постини тарк этишга мажбур бўлиши клубда сўнгги беш президентдан тўртинчи ҳолат. Бундан олдин Луис Нуньес, Жоан Гаспар ва ҳозирда қамоқда ўтирган Сандро Россел ҳам бу «бахт»дан мосуво бўлишмаган. Фақат Жоан Лапорта сўнгги кунларгача бошқарувда қолди – айнан у клубга Ферран Сориано, Чеки Багиристайн каби топ-менежерларни, шунингдек, Пеп Гвардиолани жалб қилган, Барселонага требл олиб келганди. 

Қизиғи, Бартомеу даврида ҳам требл бор, аммо Лапорта даврида бу тарихий ғалаба бир қатор ақлли қарор ва режалар натижаси бўлса, Бартомеу давридаги кўпроқ тасодиф ва Лапортанинг мероси ёрдамида қўлга киритилган.

Бартомеу «Барселона»ни дунёнинг энг кучли жамоаларидан бири сифатида қабул қилиб олиб, бир қатор ғалати ва шубҳали ёлланма ишчилар гуруҳига айлантирди ва ҳар йили Чемпионлар Лигасини шармандаларча тарк этмоқда.

Бартомеу «Барселона»ни дунёдаги энг бадавлат клублардан бири сифатида қабул қилиб, энди, янги футболчилар сотиб олиш ёки таркибидаги юлдузларга маош тўлаш имконини ҳам топа олмаётган инқироз кўчасига кириб қолди.

Бартомеу мероси – ўтган мавсумда бирорта ҳам соврин юта олмаслик, «Рома», «Ливерпуль» ва «Бавария»дан учралган шармандали мағлубиятлар, Ла Масияга бўлган эътиборсизлик, Месси билан зиддият, ўз футболчиларини танқид қилиш учун журналистларни ёллаш каби чиркин қарорлар, ҳакамлар билан жанжаллар...

Нега Бартомеу муддатидан олдин кетди?

Очиқ кўриниб турган муваффақиятсизлик ва норозиликлар фонида ҳам Бартомеу собит тура олишини Месси билан боғлиқ можароларда ҳам кўргандик.

Бартомеу бир кун олдин: «Мен клубни етарли тажрибага ва салоҳиятга эга бўлмаган бир гуруҳ инсонларга ташлаб кетишни хаёлимга ҳам келтирмаганман»

Бартомеу эртаси куни: «Истеъфога кетишга қарор қилдим»

Бартомеу шахсияти мана шу икки жумлада кўринади. Президент истеъфоси учун ишончсизлик вотуми ташкилотчиларидан бири Жорди Фарре айтганидек, «уни фақат Рим Папасининг кечириши ёки бирорта метеорит келаётгани ҳақидаги NASA баёноти қутқариб қолиши мумкин» эди холос.

Бир кунда нима ўзгарди? Каталония женералитети клуб президентига бўлган ишончсизлик референдумини ўтказиш мумкинлиги ҳақида қарор чиқарди.

Бу шундай жараёнки, агар жамоа мухлислари томонидан етарли имзо йиғилса, президент муддатидан илгари, референдум натижалари орқали ишдан кетиши мумкин. Мухлислар ўша етарли имзони йиғдилар ва энди, Бартомеунинг кетиш ёки қолиши борасида референдум ўтказиш қолганди.

Бартомеу мухториятнинг асосий органи ушбу референдумни ўтказишни тақиқлашидан умид қилганди. Яъни у пандемия шароитида кўпчиликнинг бир ерга тўпланиши нотўғри эканини илгари суриб, бундан фойдаланган ҳолатда яна ўз курсисида қолмоқчи бўлди. Шу даражадаки, «Барселона»нинг ўртача ёши 58 ёшни ташкил қиладиган расмий мухлислар гуруҳи – «сосьос»нинг соғлиғи учун қайғураётгандек кўрсатди.

Ҳокимият референдумга рухсат бергач эса, унинг натижасида мағлубият муқаррар эканини билган Бартомеу юқоридаги ҳолатни яна ўз фойдасига ишлатди ва гўёки, вазиятдан қурбон сифатида чиқиб кетди.

«Биз мухлисларнинг саломатлиги ва референдум ўртасида танлашга мажбур бўлдик. «Сосьос»нинг соғлиғи муҳимроқ деб билган ҳолда, тадбир ўтказилмайди ва ўзимиз истеъфога чиқамиз», деди Бартомеу.

«Барселона»ни ким бошқаради?

Агар директорлар кенгаши бутун таркиб билан истеъфо берадиган бўлса, қоидага кўра, президентлик вазифасини вақтинча Иқтисодий комиссия бошлиғи, яъни Карлес Тускетс қўлга олади. У Trea Capital ва Banco Mediolanum компанияларини бошқаради.

Тускетс «Камп Ноу»га 27 ёшида келган. У пайтларда клубни Жозеп Луис Нуньес бошқарарди. Айнан у эндиликда, муҳим даврда «Барселона» клубида янги сайловларни ўтказишда жавобгар бўлади. Янги президентлик сайловлари максимум 3 ой ичида ташкил этилиши керак.

Асосий номзодлар сифатида Жоан Лапорта, Виктор Фонт (Хавини олиб келмоқчи), Жорди Фарре (ишончсизлик вотуми ташкилотчиси) ва Бартомеунинг собиқ шериги Тони Фрейш тилга олинмоқда.