Мағлубият нималигини билмаётган рақиб. Ўзбекистон Суриянинг ғалабали сериясини буза оладими?

ФИФА рейтингида биздан устун бўлган жамоа

Сурия миллий жамоаси сўнгги йилларда мамлакатдаги нотинчлик сабабли футбол бўйича ички мусобақаларни ўтказа олмаётган бўлса-да, улар мунтазам равишда йиғинлар ташкил этиб, ўртоқлик учрашувларида майдонга тушишмоқда. Шу боис Сурия миллий жамоаси ФИФА рейтингида ҳам ўз ўрнини йўқотгани йўқ – тунислик мураббий Набил Малоул шогирдлари 79-ўринни банд этган. Бу 84-ўриндаги Ўзбекистон миллий жамоасидан 5 ўрин юқори демакдир.

Қайд этиш жоиз, Сурия миллий жамоаси кетма-кет сўнгги 5та расмий ўйинида фақат ғалаба қозонмоқда. Сурияликлар сўнгги марта 2019 йилнинг 10 июль куни Тожикистон миллий жамоасига мағлубиятга учраган – 2:0. Шундан кейинги 6 ўйинда 5 ғалаба ва 1та дуранг қайд этган. Бу ўйинларнинг барчаси 2019 йилда ўтказилган бўлиб, Ўзбекистон миллий жамоасига қарши ўртоқлик учрашуви Сурия учун 2020 йилдаги дастлабки баҳсга айланади.

Сурия миллий жамоасининг охирги 7 учрашуви:

10.07.2019. Тожикистон – Сурия – 2:0

16.07.2019. Ҳиндистон – Сурия – 1:1

05.09.2019. Филиппин – Сурия – 2:5

10.10.2019. Малдив – Сурия – 1:2

15.10.2019. Сурия – Гуам – 4:0

14.11.2019. Сурия – Хитой – 2:1

19.10.2019. Сурия – Филиппин – 1:0

Етакчи легионерларсиз йиғин

Вадим Абрамов қўл остидаги вакилларимиз 6 ноябрь кунидан бошлаб Тошкентда тўпланиб, 9 ноябрь куни Дубайга етиб келишди.

ФИФА кунлари бўлишига қарамай, бу сафарги йиғинда ҳам етакчи легионерларимиз турли сабаблар туфайли миллий жамоа ихтиёрига етиб кела олишмади. Жумладан, Элдор Шомуродов жароҳати боис Италиядан чақирилмаган бўлса, Одил Аҳмедов оилавий сабабларига кўра йиғинга кела олмади. «Спартак» яримҳимоячиси Остон Ўрунов жароҳати туфайли Москвада қолган бўлса, «Шаржа» вакили Отабек Шукуров ҳам жароҳат сабабли таклиф олган йиғинига кела олмайдиган бўлди.

«Шабоб Ал Аҳли» яримҳимоячиси Азизжон Ғаниев, «Сённам» яримҳимоячиси Жамшид Искандеров, «Кванчжу» ҳимоячиси Рустам Ашурматов ва Хитой 1-лигасидаги ҳимоячимиз Ислом Тўхтахўжаев БААдаги йиғинга етиб келишди.

Сурия ва Ироққа қарши Ўзбекистон миллий жамоаси таркиби:

Дарвозабонлар: Абдувоҳид Неъматов («Насаф»), Ботирали Эргашев («Қўқон-1912»), Жавоҳир Илёсов («Локомотив»).

Ҳимоячилар: Рустам Ашурматов («Кванжу», Жанубий Корея), Игорь Голбан («Навбаҳор»), Ҳусниддин Алиқулов («Насаф»), Исломжон Қобилов («Бунёдкор»), Иброҳимхалил Йўлдошев («Бунёдкор»), Ҳожиакбар Алижонов («Пахтакор»), Мурод Холмуҳаммедов («Қўқон-1912»), Фаррух Сайфиев («Пахтакор»).

Яримҳимоячилар: Лутфулла Тўраев («Бунёдкор»), Аброр Исмоилов («Пахтакор»), Азиз Турғунбоев («Навбаҳор»), Жамшид Искандеров («Сённам», Жанубий Корея), Ҳожимат Эркинов («Пахтакор»), Ойбек Бозоров («Насаф»), Акмал Мозговой («Насаф»), Санжар Қодирқулов («Бунёдкор»), Жалолиддин Машарипов («Пахтакор»), Достонбек Ҳамдамов («Пахтакор»), Азизжон Ғаниев («Шабоб Ал Аҳли», БАА).

Ҳужумчилар: Шаҳзод Убайдуллаев («Металлург»), Бобур Абдухолиқов («Насаф»), Темурхўжа Абдухолиқов («Локомотив»).

Ўзаро ўйинларда тенглик

Ўзбекистон миллий жамоаси бугунги баҳсгача Сурияга қарши 5та ўйинда майдонга тушган. Ўйинларда тенгликни кўриш мумкин – 2 ғалаба, 2 мағлубият ва 1 дуранг. Тўплар нисбатда вакилларимиз устун – 5:4.

Жамоалар ўртасидаги сўнгги ўйин ҳам ўртоқлик мақомида бўлиб, 2019 йилда Эктор Купер бошқарувидаги футболчиларимиз Элдор Шомуродовнинг дубли эвазига Тошкентда Сурия устидан 2:0 ҳисобида зафар қучганди.

Ўзаро ўйинлардаги натижалар:

12.12.1996. Ўзбекистон – Сурия – 1:2

01.09.2016. Ўзбекистон – Сурия – 1:0

23.03.2017. Сурия – Ўзбекистон – 1:0

06.09.2018. Ўзбекистон – Сурия – 1:1

11.06.2019. Ўзбекистон – Сурия – 2:0

Ўйин ТВ-трансляция қилинадими?

БААнинг Шаржа шаҳрида ўтадиган ушбу ўртоқлик учрашувининг ТВ-трансляцияси борасидаги савол ўзбекистонлик мухлисларни қизиқтирмоқда.

Аввалроқ, Сурия ва Ўзбекистон миллий жамоалари ўртасидаги ўртоқлик учрашувида кўчма телевизион станцияси бўлмаслиги ва ўйин тасвирга олинмаслиги сабабли ушбу баҳс телевидение орқали трансляция қилинмаслиги ҳақида хабар қилинганди.

Маълумотларга кўра, бугун Дубайда ўтказиладиган БАА – Тожикистон ўртоқлик учрашуви соат 19:00да бошланиши ва 21:00гача якунланиши сабабли, Шаржадаги Сурия ва Ўзбекистон баҳси ҳам ТВда намойиш этилиши учун соат 20:00дан 21:00га кўчирилган. Шундай экан, вакилларимиз иштирокидаги учрашувнинг ТВда намойиш этилиши эҳтимоли мавжуд.

Ўртоқлик учрашуви.
12 ноябрь (пайшанба)
Сурия – Ўзбекистон
Стадион: Шаржа, БАА.
Ўйин бошланиш вақти: 21:00 (Тошкент вақти билан)

Усмон Ибодов тайёрлади.