Ўзбекистон 2020 йилда 78,87 миллион АҚШ доллари миқдорда пахта толасини экспорт қилган.
Ўзбекистоннинг 2020 йилдадаги пахта толаси экспорти 65,35 фоизга қисқариб, 78,87 миллион АҚШ долларини ташкил қилган. 2019 йилда республика 227,61 миллион АҚШ доллари миқдорида пахта толаси экспорт қилинганди.
Пахта экспорти 2020 йил давомида фақат сентябр ойида 2019 йилдагига нисбатан баланд бўлган.
Экспорт ҳажми камайиши пахта хомашёсидан юқори қўшилган қийматга эга бўлган тўқимачилик маҳсулотларини ишлаб чиқариш ва экспортга йўналтириш кўзланаётгани билан изоҳланган.
«Пахтачилик соҳасида бозор тамойилларини кенг жорий этиш чора-тадбирлари тўғрисида»ги 2020 йилнинг 6 мартида қабул қилинган президент фармонига биноан, республикада пахта хомашёси ишлаб чиқариш ва мажбурий сотиш режаси, унинг нархини давлат томонидан белгилаш амалиёти бекор қилинган.
Ўзбекистон сўнгги йилларда пахта экспортини йилдан йилга камайтирмоқда. Хусусан, 2016 йилда 416 минг тонна, 2017 йилда 278,9 минг тонна, 2018 йилда эса 115,6 минг тонна пахта толаси экспорт қилинган.
Инвестициялар ва ташқи савдо вазири Сардор Умурзоқов 2019 йилда Япониянинг Nikkei Asian Review нашрига берган интервьюсида пахта толасини экспорт қилишни тўхтатиш ҳақида айтиб ўтганди. У ўшанда 2025 йилга бориб Ўзбекистон йилига 8 миллиард АҚШ доллари миқдордаги тўқимачилик махсулотларини экспорт қилишни режалаштирганини айтиб ўтганди.
Аввалроқ, Cotton Campaign халқаро коалицияси Ўзбекистон пахта далаларида 2020 йилги ҳосилни йиғиб олишда мажбурий меҳнатга барҳам беришда кузатилган сезиларли олға силжишларни эътироф этганди.