Сўнгги бир неча йилда яшин тезлигида оммалашган Telegram миллионлаб инсонларнинг мулоқот одатларини ўзгартириб юборди. Бу мессенжер ўзбекистонликлар ҳаётига ҳам чуқур кириб борди.
Илованинг катта тезликда оммалашиб бориши бизнес учун ҳам янги имкониятларни яратди. Хусусан, асосан Telegram'даги каналларда реклама тарқатишга ихтисослашган компаниялар вужудга келди.
Ана шундай компаниялардан бири – ClickMe реклама-маркетинг агентлиги Telegram'нинг ўзбек сегментидаги 200дан ортиқ каналларга реклама жойлаштириш билан шуғулланади. Kun.uz ушбу компания асосчиси Тимур Бакиев билан суҳбат ташкил этди.
— Келинг, аввал Telegram Ўзбекистонда қандай оммалаша бошлагани ҳақида гапирсак. Илова 4-5 йил олдин машҳур бўла бошлаган эди. Ўша пайтда Ўзбекистондаги мессенжерлар орасида етакчи бўлган WhatsApp нима сабабдандир блоклангани Telegram'нинг оммалашишида биринчи катта тўлқин вазифасини бажарганди.
Иккинчи омил – смартфонлар нархлари. 4-5 йил олдин Ўзбекистон бозорида сифатли смартфонлар қимматлиги боис кўп эмасди. Ўтган йиллар мобайнида эса аҳолининг айнан смартфон ишлатиши сезиларли даражада ортди.
Бунга сабаблардан бири – нархи 100 долларгача бўлган арзон Xiaomi смартфонларининг бозорга кириши бўлди. Энди яхши смартфонлар аввалгидек 300-400 доллар эмас. Шундай қилиб, кўпроқ одамлар смартфон сотиб ола бошладилар ва улар ўрнатган биринчи илова Telegram бўлди. Чунки атрофдаги ҳамма айнан шу мессенжердан фойдаланаётган эди.
Бошқа бир омил эса Telegram'да канал очиш имконияти пайдо бўлгани эди. Бу имконият пайдо бўлиши ўзбек тилида сўзлашувчи аҳоли жиддий ахборот танқислигини ҳис қилаётган пайтга тўғри келди.
Масалан, сайт очиш учун сизга дастурчи керак, серверлар керак, сайтни олиб борадиган муҳаррирлар керак. Энг муҳими, бизга таҳририят сиёсати керак. Тўғрими? Telegram каналлари пайдо бўлиши билан бу анча осонлашди.
Мисол учун, футболга қизиқувчи одам шунчаки Telegram'да канал очади ва у ерда жонли эфирлар олиб боради, голлар киритади ва бу ўз-ўзидан оммалашиб кетади.
Telegram тезда оммалашиб кетишининг техник сабаблари ҳам бор. Бизда ҳали интернет жуда кучсиз ва қиммат. Масалан, Қозоғистонни олайлик, трафик арзон, овозли қўнғироқлар эса Ўзбекистонга қараганда қиммат. Бизда-чи? Бизда аксинча, трафик қиммат, телефонлашиш эса арзон.
