«Ёмғир ёғса лойқа сувдан ичамиз, таксичилар кўчамизга киришга оғринади» — қўрғончаликлар мурожаати

Қирғизқўрғон кўчаси маҳалла марказидан 4 км узоқда жойлашган. Мурожаатчиларнинг айтишича, йўл ёмонлиги сабаб таксичилар кўчага киргани оғринишади. Ҳатто «20 минг сўмга ҳам кирмайман», дейдиганлари ҳам учраб туришини айтишди.

Маҳаллада тиббий муассаса йўқлиги ва носоз йўлдан машина кам юргани сабабли муолажа олиш учун беморлар баъзан 4–5 км пиёда йўл босиб, қишлоқ врачлик пунктига боришади.

Маҳаллада яшовчи Дилдора Раҳмонованинг айтишича, авваллари маҳалланинг бу қисмида патронаж ҳамширанинг хонаси бўлган. Кейинчалик у ҳам кўчиб кетган.

Йўл ёмонлиги тез ёрдам машиналари ҳам кечикиб келишига сабаб бўлади.

Маҳалла раиси Фарҳод Раҳмоновнинг айтишича, маҳаллий ҳокимлик 2020 йилда ҳудудни «Обод қишлоқ» дастурига киритишга ваъда берган. «Пандемия бошлангани сабаб дастурга киритилиши қолдирилган», – дейди маҳалла раиси.

Маҳалла аҳолиси ичимлик суви муаммосидан ҳам азият чекади. 2020 йил охирида вилоят ҳокимлиги томонидан маҳаллага ажратилган 500 млн сўм маблағ эвазига маҳалланинг маълум қисмига ичимлик суви тортилган.

Қирғизқўрғон ва Шожалилов кўчаларида яшовчи аҳоли эса ариқда оқиб турган сувдан истеъмол қилади.

«Ҳозир ёғингарчилик йўқ. Ариқдан оқаётган сувларимиз тиниқ. Озгина ёғингарчилик бошланса, лойқа сувдан истеъмол қиламиз» – дейишмоқда маҳалладагилар.

Бу масала бўйича Учқўрғон туман ичимлик суви билан шуғулланувчи мутасаддилардан ҳамда йўл унитар корхонасидан муносабат сўрадик.

«Наманган сув таъминот» МЧЖ Учқўрғон туман бўлими муҳандиси Улуғбек Аҳмедовнинг сўзларига кўра, маҳалла ҳудудида 3 км сув тармоғи қуриш режалаштирилган. Шундан 800 метр қисми охирига етказилмаган.

Унинг айтишича, Қирғизқўрғон ва Шожалилов кўчаларини сув билан таъминлаш ишлари 2021 йилда якунланади.

Учқўрғон йўллардан фойдаланиш унитар корхонаси бош муҳандиси Шавкат Рустамовнинг сўзларига кўра, маҳалла ҳудудидаги йўллар 11 километрни ташкил қилади. Дастурга асосан, 2021 йил бошида Янгиҳаёт кўчасидан 1,5 км қисми шағаллаган. Умарқори номли кўчадан ҳам 1,5 км шағаллаш режага киритилган. Маҳалла аҳли тилга олаётган кўча эса сентябр ойида таъмирланиши айтилди.

Маълумот учун, Учқўрғон ҳокими Азимжон Ваҳобов давлат раҳбарининг Наманганга ташрифида туман инфратузилмаси учун 90 млрд сўм атрофида маблағ зарурлигини айтган. Туман ҳокими президентдан бу муаммоларни бартараф этиш учун 40 млрд маблағ сўраган эди. 50 миллиарди эса маҳаллий бюджетдан қоплашини билдирган.

«Пул топилади, муаммо мукаммал бартараф этилса, йил якунига қадар ўзим орден бераман сенга», – деган эди президент Шавкат Мирзиёев.

Тоҳиржон Турсунов,
Kun.uz мухбири