Маънавият ва маърифат маркази ҳузурида янги жамғарма ташкил этилди. Унга 120 млрд сўм ажратилади

Президентнинг «Маънавият ва ижодни қўллаб-қувватлаш мақсадли жамғармасини ташкил этиш тўғрисида»ги қарори қабул қилинди.

Ҳужжатга мувофиқ «Ижод» жамоат фонди тасарруфидаги Ёзувчилар уюшмаси поликлиникаси, «Дўрмон» ижод уйидан фойдаланиш дирекцияси» УК ва «Оққум файз барака» ШК Ёзувчилар уюшмасига ўтказилади.

«Ижод» жамоат фонди негизида Республика Маънавият ва маърифат маркази ҳузурида юридик шахс мақомисиз Маънавият ва ижодни қўллаб-қувватлаш мақсадли жамғармаси ташкил этилади.

Қуйидагилар жамғарма маблағларини шакллантириш манбалари этиб белгиланди:

• республика бюджетидан ажратиладиган маблағлар;
• жисмоний ва юридик шахсларнинг ҳомийлик хайриялари;
• халқаро молия институтлари ва бошқа хорижий донорларнинг грантлари ва имтиёзли кредитлари;
• вақтинча бўш турган маблағларни тижорат банклари депозитларига жойлаштириш ҳисобидан олинган даромадлар;
• қонун ҳужжатларида тақиқланмаган бошқа манбалар.

Жамғарма маблағлари қуйидаги тадбирларни молиялаштириш учун йўналтирилади:

• узлуксиз маънавий тарбия концепцияси асосида мактабгача таълим, умумий ўрта таълим, ўрта махсус ва олий таълим босқичлари учун методик қўлланма, услубий тавсиялар, илмий-амалий адабиётлар яратиш, уларни нашр этиш ва жойларга етказиш;
• миллий мерос, буюк аждодларнинг жаҳон тамаддунига қўшган улкан ҳиссаларини дунё миқёсида кенг тарғиб қилишга қаратилган чора-тадбирларни амалга ошириш;
• IT-парклар, инновацион марказлар ва фрилансерлар билан ҳамкорликда мобил иловалар, компьютер ўйинлари, анимацион маҳсулотлар яратиш;
• жойларда маънавий-маърифий муҳитни ўрганиш, ҳудудий маънавият ва маърифат кенгашлари фаолиятини ривожлантиришга кўмаклашиш, тарғибот-ташвиқот ишлари самарадорлигини ошириш мақсадида ташкил этилган экспертлар гуруҳларини қўллаб-қувватлаш;
• мамлакат ва халқаро миқёсда илмий-маърифий тадбирлар, адабий анжуманлар, фестиваллар, танловлар, халқ сайиллари, адабий-мусиқий кечалар ўтказиш;
• маънавий-маърифий, адабий-бадиий китоб ва плакатлар нашр этиш, замонавий тарғибот воситалари ва медиа маҳсулотлар яратиш ва бошқалар.

Молия вазирлиги томонидан жамғармага 2021 йилда 120 млрд сўм, жумладан:

• Республика Маънавият ва маърифат марказига мамлакат миқёсида маънавий-маърифий ишларни самарали ташкил этиш учун – 10 млрд сўм;
• унинг ҳудудий бўлимларига жойларда маънавий-маърифий соҳаларни ривожлантириш учун – 90 млрд сўм;
• Ёзувчилар уюшмаси фаолиятини қўллаб-қувватлаш учун – 20 млрд сўм маблағ ажратилади.

2022 йилдан бошлаб жамғарма васийлик кенгаши томонидан тасдиқланган харажатлар сметаси ва прогноз кўрсаткичларга мувофиқ маблағ ажратиб борилиши таъминланади.

Президентнинг 26.02.2010 йилдаги ПҚ-1292-сон қарори ўз кучини йўқотган деб ҳисобланади.