Австралияда 60 ёшгача бўлганлар AstraZeneca вакцинаси билан эмланмайдиган бўлди

Австралияда эҳтимолий ножўя таъсирлар боис 60 ёшгача бўлганларнинг коронавирусга қарши AstraZeneca вакцинаси билан эмланиши тақиқланди. Бу ҳақда ABC хабар бермоқда.

Мамлакат соғлиқни сақлаш вазири Грег Ҳантнинг сўзларига кўра, ҳукумат Австралия иммунизация бўйича техник маслаҳат гуруҳи тавсияларини қабул қилди ва эндиликда 60 ёшдан кичик бўлганларга Pfizer компанияси вакцинаси таклиф этилади.

Аммо Ҳантнинг айтишича, мамлакатда 50 ёшдан 59 ёшгача бўлган 815 мингга яқин киши AstraZeneca вакцинасининг камида бир дозаси билан эмланган. Шифокорларнинг фикрича, агар биринчи эмлашдан сўнг ножўя таъсирлар кузатилмаган бўлса, иккинчи доза хавфли эмас.

ABC маълумотига кўра, Австралияда AstraZeneca вакцинаси билан эмланган 3,8 миллиондан ортиқ кишининг 60 нафарида қон қуюлиши режими бузилиши кузатилган. Улардан икки нафари вафот этган, 22 нафари шифохонада даволанмоқда.