Абдулазиз Комилов коронавирусга қарши тўлиқ эмланган. Сардор Умурзоқов ва Бобур Бекмуродов ҳам Moderna’нинг биринчи дозасини олди

«Сўнгги вақтда менга Вазир вакцина олганми деган савол билан кўп мурожаатлар келиб тушмоқда. Шуни маълум қиламанки, Ўзбекистон Республикаси Ташқи ишлар вазири Абдулазиз Комилов Ўзбекистонда рўйхатга олинган вакциналардан бири билан тўлиқ эмланган», деб ёзади ТИВ расмийси.

Шунингдек, Юсуф Қобилжонов пандемияни тўхтатиш учун барчани вакцина олишга чорлаб қолишини билдирган ва Комиловнинг вакцина олганидан кейинги расмини илова қилган.

9 август куни Ўзбекистон Инвестициялар ва ташқи савдо вазирлигида идора раҳбарияти ва ходимларини эмлаш тадбирлари бошлангани, вазир Сардор Умурзоқов коронавирусга қарши Moderna вакцинаси билан эмлангани хабар қилинганди.

12 август куни «Юксалиш» умуммиллий ҳаракати раиси Бобур Бекмуродов Moderna вакцинасининг биринчи дозаси билан эмлангани маълум қилинди.

Аввалроқ президент Шавкат Мирзиёев коронавирусга қарши тўлиқ эмлангани маълум қилинганди. Давлат раҳбари матбуот котиби Шерзод Асадов ОАВ вакиллари учун ўтказилган брифингда маълум қилишича, президент масъулиятли фуқаро сифатида, ўша вақтда Ўзбекистонда рўйхатдан ўтган уч вакцина - ZF-UZ-VAC2001, AstraZeneca ва «Спутник V» вакциналаридан бири билан тўлиқ эмланган. 

Шунингдек, Ўзбекистон бош вазири Абдулла Арипов ҳам жорий йилнинг бошида ZF-UZ-VAC-2001 ўзбек-хитой вакцинаси билан биринчилардан бўлиб эмлангани маълум қилинган эди.

Июнь-июль ойлари давомида кўплаб амалдорлар коронавирусга қарши вакцина қабул қилиш кампаниясида иштирок этган, хусусан, Ўзбекистон бош вазири ўринбосари Беҳзод Мусаев ҳам эмланганди. Бундан ташқари, Мактабгача таълим вазири Агриппина Шин (Спутник V), Тошкент шаҳар Соғлиқни сақлаш бош бошқармаси бошлиғи Анвар Алимов (ўзбек-хитой вакцинаси), Халқ таълими вазири Шерзод Шерматов (ўзбек-хитой вакцинаси), маданият вазири Озодбек Назарбеков (Спутник V), Маҳалла ва оилани қўллаб-қувватлаш вазири Раҳмат Маматов (Спутник V), Тошкент шаҳри ҳокими Жаҳонгир Ортиқхўжаев (ўзбек-хитой вакцинаси), Наманган вилояти ҳокими Шавкат Абдураззоқов (Спутник V) ҳамда Тошкент вилояти ҳокими Даврон Ҳидоятовнинг вакцина олиш жараёнида олинган суратлари эълон қилинганди. Шунингдек, Сенат раиси Танзила Норбоева 2021 йилнинг май—июнь ойларида «Спутник V» вакцинаси билан эмлангани маълум бўлган.