Kun.uz мухбири хабарига кўра, тадбирда 500 нафарга яқин тадбиркор бевосита иштирок этаётган бўлса, ҳудудларда онлайн тарзда 10 минг нафардан ортиқ тадбиркор кузатиб бормоқда.
Мулоқотда соҳага оид тизимли муаммоларни бартараф этиш чора-тадбирлари муҳокама қилинади ва тадбиркорларнинг таклифлари эшитилади. Тадбир бошида бундай тадбир илк марта ўтказилаётгани таъкидланди.
Президент билан очиқ мулоқотга тайёргарлик жараёнида мурожаатларни қабул қилиш муддати бир неча марта узайтирилди ва бу мурожаатлар сони жуда кўп эканлиги билан изоҳланди. Инвестициялар ва ташқи савдо вазирлиги маълумотларига кўра, бугунги кунга қадар 15309 та мурожаат келиб тушган ва уларнинг 12 мингдан ортиғида кўтарилган масалалар ўз ечимини топган.
Президент ўз нутқини йиғилганларга салом йўллашдан бошлади ва юқоридаги рақамларга тўхталди:
“Тадбиркорларнинг муаммолари ечилгани яхши, лекин бу вақтинча бўлмаслиги керак. Мен ҳоким, бош вазир бўлганимда тадбиркорларни қандай қандай муаммолар қийнаётганини билганман. Менда уларга ечим топиш керак деган армоним бор.
Тадбиркор сезсинки, у ҳозирги Янги Ўзбекистоннинг замини. Беш нафар одам ишлатадими, ўн кишига иш берадими, у ҳозирги ислоҳотларнинг ислоҳотчиси. Нима учун президент бу муаммолар учун вақт топади-ю, ҳоким улар билан шуғулланишга вақт топа олмайди?! Биз халқимизни рози қиламиз десак, тадбиркорларга кўмакчи, елкадош бўлишимиз, қонунчиликка керакли ўзгартишларни киритишимиз лозим.
Ҳали жуда кўп қонунларимиз тадбиркорларга маъқул эмаслигини тан олишимиз керак. Лекин сизларга шуни айтаман – шошилманглар, биз бирлашиб буларни албатта ҳал қиламиз.
Албатта, ҳамма муаммони бир кунда ҳал қилиб бўлмайди. Муҳими, бизнинг ҳал қилишга ҳаракат қилишимиз. Қонун ва яна қонун ишлаши керак. Яқинда ҳам тадбиркорларда “эрталаб туриб, кечқурун тинч уйимга тинч келармиканман”, деган қўрқув бор эди.
25 йилда ололмаган GSP+’ни 5 йилда олиш осон эмас. Бунинг учун қанчадан қанча ишларни қилдик. Буюк байрамимиз олдидан сизлар билан учрашганимиз сабаби “Меҳр кўзда” дейдилар. Истагим, сизлар билан ўртамизда самимий мулоқот кўприги пайдо бўлсин.
Жойлардаги раҳбарлар фақат халқ учун хизмат қилиши керак. Чунки менга шу халқ берган ваколат билан мен уларга ваколат берганман”, деди давлат раҳбари ўз сўзининг бошида.
