Россия Тожикистондаги ҳарбий базасини танкка қарши ракета мажмуалари билан кучайтирди

«Корнет» танкка қарши ракета мажмуалари душманнинг зирҳланган техникаси ва вертолёт ҳамда дронларни йўқ қилишга мўлжалланган.

Фото: ТАСС / Мальгавко Сергей

Россиянинг Тожикистондаги ҳарбий базасига «Корнет» танкка қарши ракета мажмуалари келтирилди. Бу ҳақда Азия-Плюс Марказий ҳарбий округ матбуот хизматига таяниб хабар берди.

Хабарда айтилишича, «Корнет» танкка қарши ракета мажмуалари душманнинг зирҳланган техникаси ва вертолёт ҳамда дронларни йўқ қилишга мўлжалланган.

Ракета 100 метрдан 5,5 километргача масофадаги нишонларни ура олади.

Россиянинг Тожикистондаги 201-ҳарбий базаси Душанбе ва Бохтар шаҳарларида жойлашган. Унинг таркибига мотоўқчи, танк, артиллерия, разведка, ҳаво ҳужумидан мудофаа бўлинмалари киради.