Фармон 17 сентябр куни Россиянинг ҳуқуқий ахборот расмий порталида эълон қилинди. Reuters маълумотига кўра, Швейцариянинг Nestlé озиқ-овқат концерни ва Франциянинг Auchan чакана савдо гуруҳига тегишли Россия активлари «Л.Е.В. Менеджмент» компаниясининг вақтинчалик бошқарувига берилган.
DW маълумотига кўра, фармон жами 81 та корхонадаги акция ва улушларни қамраб олади. Рўйхатдан Nestléʼнинг Россиядаги тузилмалари, Auchanʼнинг шуъба корхоналари, шунингдек, Франциянинг FM Logistics ва NG Concept логистика компаниялари билан боғлиқ активлар ҳам жой олган.
Бундан ташқари, Leroy Merlin томонидан Россияда ташкил этилган «Ле Монлид» компаниясидаги айрим улушлар ҳам «вақтинчалик бошқарув»га берилган.
Янги фармон бўйича активларни бошқариш «Л.Е.В. Менеджмент» компаниясига топширилди.
Россия 2023 йилдан бери айрим хорижий компаниялар активларини «вақтинчалик бошқарув»га ўтказиш механизмини қўллаб келмоқда. Бу механизм аввал Danone ва Carlsberg каби компанияларнинг Россиядаги активларига нисбатан ҳам ишлатилган.
Reuters қайд этишича, Россия Украинага қарши кенг кўламли уруш бошланганидан кейин хорижий компаниялар активлари устидан назоратни кучайтирган. 2023 йилда имзоланган фармон Москвага Россия «дўст бўлмаган» деб ҳисоблайдиган давлатлар компанияларининг активларини вақтинчалик бошқарувга ўтказиш имконини берган.
Nestlé Россия бозорида фаолиятини давом эттириб келаётганини ва буни аҳоли учун асосий озиқ-овқат маҳсулотларини етказиб бериш зарурати билан изоҳлаган. Компания Reutersʼга аввалроқ унинг активларини вақтинчалик бошқарувга ўтказиш бўйича Россия расмий идораларидан мурожаат олмаганини билдирган.
