Samsung бутун дунё бўйлаб телевизорларини масофадан блоклай олишини маълум қилди 

Жанубий Кореянинг Samsung компанияси ўзи ишлаб чиқарган телевизорларини дунёнинг исталган бурчагида масофадан блоклай олади. Бу ҳақда компания баёнотига таяниб XDA Developers интернет портали маълум қилди.

Компания телевизорларида TV Block функцияси мавжуд бўлиб, у телевизорни масофадан блоклаш имконини беради. Бу функция телевизордан фақат унинг қонуний эгасигина фойдаланишини кафолатлайди. Ушбу технологиядан мақсад телевизорларнинг дўконлар, омборлар ва фойдаланувчилар уйларидан ўғирланишига қарши курашиш ҳисобланади. 
 
Samsung’да таъкидланишича, ушбу функция компаниянинг барча телевизорларида ўрнатилган.
 
Функция ўғирланган телевизор серия рақами компания серверидаги рўйхатга киритилиши билан фаоллаштирилади. Бундай телевизор интернетга уланганда, унинг дастури серия рақами рўйхатда бор-йўқлигини текширади ва уни топгудек бўлса, телевизорнинг барча функциялари блоклаб қўйилади.
 
Телевизорнинг барча функцияларини тиклаш учун компанияга қурилмани сотиб олганлик тасдиқномаси ва амал қилувчи лицензия юборилиши керак.