Ҳаити бош вазири президентнинг ўлдирилишига алоқадорликда гумон қилинмоқда

Ҳаити бош вазири Ариэл Анри президент Жовенел Моизнинг ўлдирилиши иши бўйича прокуратурага сўроқ қилиш учун чақиртирилгандан кейин Ҳаити фуқароларини ҳимоялаш бошқармаси унинг истеъфосини талаб қилди.

Фото: REUTERS/Ralph Tedy Erol

“Президент Жовенел Моизнинг ўлдирилиши ишида адолат ўрнатилиши ва бу иш бўйича тергов давом этиши учун Ариэл Анри дарҳол истеъфога чиқиши лозим”, деб айтилган бошқарма баёнотида.

Ҳаити мобил алоқа оператори бош вазир Моиз ўлдирилгандан бир неча соат ўтиб президентнинг эҳтимолий қотилларидан бири Жозеф-Феликс Бадьё билан телефон орқали гаплашганини тасдиқлагандан кейин у прокуратурага кўрсатма беришга чақиртирилган. Анри прокуратурага 14 сентябрда келиши белгилаб қўйилган.

Бошқармада таъкидланишича, бу маълумот пайдо бўлгандан кейин Анри эндиликда президент ўлдирилишида гумонланувчига айланади ва шу сабабли халқаро ҳамжамият уни қўллаб-қувватламаслиги керак.

2017 йилдан Ҳаитига раҳбарлик қилиб келган Жовенел Моиз 7 июлда ўз қароргоҳига уюштирилган ҳужум вақтида ҳалок бўлган. Моизнинг рафиқаси Мартин Моиз ҳам жароҳатлар олган ва Майамига даволаниш учун олиб кетилган. Кейинроқ Мартин Моиз ёлланма қотиллар турмуш ўртоғининг ислоҳотлари учун уни ва оиласини ўлдирмоқчи бўлганини айтган.

Моизнинг ўлдирилишига алоқадорликда гумонланиб 26 киши қўлга олинган. Уларнинг аксариятини колумбияликлар ташкил қилади. Бироқ ёлланмалар орасида америкалик фуқаролар ҳам бор бўлиб, уларнинг таъкидлашича, улар фақатгина таржимонлик қилишган ва Моизнинг ўлдирилишини Майк исмли хорижлик буюртирган.

Моизнинг ўлимидан кейин мамлакат бошқарувини Анри ўз қўлига олган.