Туркияда Ҳаити президентини ўлдиришда гумонланган шахс қўлга олинди

Интерпол қидирувида бўлган Хандал Истанбул аэропортида АҚШдан Иорданияга учадиган самолётга чиқишга уринган пайтида қўлга олинган.

Фото: cleanbowled

Туркия ҳукумати шу йилнинг июлида Ҳаити президенти Жовенел Моизни ўлдиришда гумонланган шахсни қўлга олди. Бу ҳақда Ҳаити ташқи ишлар вазири Клод Жозеф маълум қилди.

«Мен ҳозиргина Туркия вазири Мавлут Човушўғли билан телефонда гаплашдим ва президентни ўлдиришда гумонланганлардан бири Самир Хандални ҳибсга олгани учун Туркияга миннатдорлик билдирдим», – деб ёзди Жозеф Twitter саҳифасида.

Reuters агентлигининг маълумотига кўра, Интерпол қидирувида бўлган Хандал Истанбул аэропортида АҚШдан Иорданияга учадиган самолётга чиқишга уринган пайтида қўлга олинган.

7 июлда Ҳаити президенти Жовенел Моиз ўз қароргоҳида ўлдирилганди. Клод Жозеф вақтинчалик ҳукумат раҳбари этиб тайинланган.

Маълум бўлишича, президент Моизни 28 кишидан иборат ёлланма қотиллар гуруҳи ўлдирган.