Криштиану Роналду Португалия миллий терма жамоасининг яқин кунлардаги ўйинларига «чақирилмасликни афзал кўраётгани» ҳақида CNN Portugal журналисти Руй Сантуш хабар қилди. Унинг сўзларига кўра, Роналдунинг мамлакат футбол федерацияси раҳбариятидан кўнгли қолган. У ўзига нисбатан «адолатсиз муносабатда бўлишган», деб ҳисобламоқда, «ўзини хиёнатга учрагандек ҳис қилмоқда» ва «ҳақиқат у тарафида эканига қатъий ишонмоқда».
Португалия футбол федерацияси (FPF) ва Криштиану Роналду ўртасидаги қарама-қаршилик сентябр охирларида ошкора тус олди. Ойнинг сўнгги куни 41 ёшли ҳужумчи миллий жамоа йиғини давом этаётган бир пайтда кутилмаганда жамоа қароргоҳини тарк этди. Роналду норвегияликларга қарши ўйинда юз берган воқеадан норозилигини шу тарзда билдирди. Ушбу учрашув футболчи учун миллий жамоа сафидаги 235-ўйин бўлиши мумкин эди. Бироқ жамоа сардори захира ўриндиғида қолди. Иккинчи бўлимда у узоқ вақт майдон четида қизиб олди, аммо захирадан ўйинга туширилмади.
Охирги пайтда миллий жамоага катта фойда келтира олмаётган Роналдунинг йўқлиги португалияликларга салбий таъсир кўрсатмади. Португалия Миллатлар лигасидаги тўртта ўйинни тўртта ғалаба билан якунлади.
Кўп ўтмай FPF раҳбари Педру Пруэнса ва жамоа бош мураббийи Жоржи Жезуш футболдан ҳам қизиқарлироқ бўлиб қолган ушбу мавзуга яна қайтишди. Улар муросага тайёр эканликларини билдириб, юлдуз футболчи билан музокара ўтказишга рози бўлишди.
19 октябр куни FPF томонидан эълон қилинган жазо Португалия футбол раҳбарларининг ўз афсонасига ниҳоятда юмшоқ муносабатда бўлишининг навбатдаги намунаси бўлди. Криштиану Роналду терма жамоа йиғинини ўзбошимчалик билан тарк этгани учун миллий жамоадан 30 кунга четлатилди. Бу қоидага кўра белгиланиши мумкин бўлган энг кам муддат эди. Бундан ташқари, жазо муддати қоидабузарлик содир этилган кундан — 30 сентябрдан бошлаб ҳисобланиши керак эди. Бу эса Роналдунинг амалда терма жамоадан четлатилмаганини англатарди. Чунки Португалия миллий жамоаси навбатдаги ўйинларини 14 ва 17 ноябр кунлари Дания ҳамда Уэлсга қарши ўтказади. Шунингдек, FPF футболчини 255 евро жаримага ҳам тортди. Бу сумма Роналдунинг даромадларини ҳисобга олганда (футболчи «Ал-Насср» клубида ҳафтасига 4 миллион еврога яқин пул ишлайди), жудаям кулгили. Бундай юмшоқ жазо ОАВда ҳазил ва масхара мавзусига айланди.
Яна бир жиҳат ҳам алоҳида кулгига сабаб бўлди: FPFнинг 29 саҳифалик қарорида айтилишича, Криштиану Роналду жазони енгиллаштирувчи ҳолат сифатида ўзининг футболдаги хизматларини ҳисобга олишни сўраган ва ҳатто «резюмесининг нусхаси»ни тақдим этган. Тартиб-интизом қўмитаси унинг «футбол ривожига қўшган ҳиссаси»ни ҳамда «пушаймонлигини намоён этгани»ни енгиллаштирувчи омил сифатида инобатга олган.
