Мексикада меҳмонхонадан 20 нафар хорижлик ўғирлаб кетилди

Мексиканинг марказий қисмидаги Сан-Луис-Потоси штатида номаълум кишилар меҳмонхонадан 20га яқин хорижий фуқарони ўғирлаб кетишди. Бу ҳақда штат прокуратураси маълум қилди.

Фото: Especial

Прокуратура бошлиғи Федерико Эрреранинг таъкидлашича, воқеа юз берган Матеуала шаҳрига тергов ўтказиш ва ўғирлаб кетилган хорижликларни топишда ёрдам бериш учун прокуратура ходимлари жўнатилган.

Гувоҳларнинг маълум қилишича, босқинчилар меҳмонхонага 3та автомобилда келиб, хорижликларни номаълум йўналишда олиб кетишган. Таъкидланишича, ўғирланган хорижликлар орасида Ҳаити ва Венесуэла фуқаролари бор.

Ҳар йил зарур ҳужжатларсиз бўлган юз минглаб муҳожирлар Мексика орқали АҚШга ўтишга ҳаракат қилади. Улар бу йўлда кўпинча жиноий гуруҳлар ва одам савдогарлари қурбонларига айланади. 29 августда Мексика президенти Андрес Мануэль Лопес Обрадор ҳукумат миграция оқимини тўхтатишни давом эттиришини, аммо бунинг учун авваламбор одамларни ўз давлатларини тарк этишга мажбур қилувчи муаммоларни ҳал қилиш лозимлигини айтган.