Илонлар сайёрадаги энг хилма-хил ва экологик жиҳатдан муҳим судралиб юрувчилардан бири ҳисобланади. Улар чўллардан тортиб нам тропик ўрмонларгача бўлган турли табиий шароитларда яшайди.

Илонлар экотизимда ҳам йиртқич, ҳам бошқа ҳайвонлар учун ўлжа сифатида озиқ-овқат занжирининг муҳим қисми ҳисобланади. Шу орқали улар табиий экологик мувозанатни сақлашда иштирок этади.

Worldostats маълумотларига асосланган рейтингда табиий ва географик шароитлари хилма-хил бўлган мамлакатларда илон турлари кўпроқ экани қайд этилган.

1. Мексика — 438 тур

Мексика 438 турдаги илон билан рейтингда биринчи ўринда. Мамлакатда қурғоқчил чўллардан нам тропик ўрмонларгача бўлган турли экотизимларнинг мавжудлиги илонларнинг кўплаб турлари яшаши учун қулай шароит яратади.

Мексикадаги машҳур турлар қаторига шақилдоқ илонлар ва ёрқин рангли сут илонлари киради.

2. Бразилия — 420 тур

Иккинчи ўринни 420 га яқин тур билан Бразилия эгаллаган.

Амазония тропик ўрмонларини ҳам ўз ичига олган улкан ҳудуд мамлакатда бой ҳайвонот дунёси шаклланишига имкон берган. Бу ерда заҳарли бушмейстердан тортиб кўплаб заҳарсиз илон турларигача учрайди.

3. Индонезия — 376 тур

Индонезия архипелагида қарийб 376 турдаги илон яшайди. Тропик иқлим ва қалин ўрмонлар улар учун қулай табиий муҳит ҳисобланади.

Бу ерда дунёдаги энг узун илонлардан бири — тўрсимон питон, шунингдек, кобраларнинг турли хиллари учрайди.

4. Ҳиндистон — 305 тур

Ҳиндистонда 305 га яқин илон тури мавжуд. Улар Ҳимолай тоғолди ҳудудларидан тортиб соҳилбўйи текисликларигача тарқалган.

Ҳинд кўзойнакли кобраси ва Рассел қора илони мамлакатдаги машҳур турлар қаторига киради.

5. Колумбия — 301 тур

Колумбияда 301 га яқин илон тури учрайди. Тропик ўрмонлар, тоғлар ва пасттекисликлардан иборат хилма-хил релеф бундай бой биоранг-баранглик учун шароит яратган.