Ўнлаб кишилар бедарак йўқолган деб ҳисобланмоқда; шаҳарлар бутунлай вайрон бўлган. Жума куни кечқурун регионга жами 30га яқин торнадо ёпирилган.
Президент Жо Байден АҚШ ҳукумати мамлакатнинг торнадодан жабрланган марказий ҳудудларига ёрдам кўрсатиш учун бор имкониятлар ишга солинишини маълум қилган.
Байден фавқулодда вазиятлар ҳақидаги декларацияни имзолаган, бу орқали энг кўп жабр кўрган Кентукки штати учун федерал ресурслар ажратиш мумкин бўлади. У торнадони мамлакат тарихидаги энг талафотли табиий офатлардан бири деб атади.
Кентукки
Кентуккида 70дан ортиқ кишининг ўлими тасдиқланган, Мэйфилд шаҳридаги шам ишлаб чиқариш заводи томи босиб тушиши оқибатида ўнлаб кишилар қурбон бўлган. Табиий офат вақтида заводда 100га яқин киши бўлган.
Грейвс округида жойлашган, 10 минг атрофида аҳоли истиқомат қиладиган Мэйфилд шаҳри - торнадодан энг кўп жабрланган шаҳар бўлиб турибди.
Заводда 40дан ортиқ киши қутқариб қолинган, Кентукки штати губернатори Энди Бешир яна кимнидир тирик топиш мўъжиза бўлишини айтиб ўтган.
Беширнинг сўзларига кўра, штатда қурбонлар сони 100га яқинлашиши мумкин.
Мэйфилд мэри Кэти Стюарт О'Нан CBS мухбирига берган интервьюсида шам заводи «худди бомба ташлангандек» ҳолатда эканини айтган. Кўплаб бинолар ер билан битта бўлган.
Кучли шамол туфайли Ҳопкинс округида поезд рельсдан чиқиб кетган.
Кентуккида фавқулодда ҳолат эълон қилинган.
Маҳаллий расмийлар қийин ҳолатга тушиб қолган - Мэйфилддаги полиция участкаси вайрон бўлган, ўт ўчирувчиларнинг машиналари ва бошқа жиҳозларига шикаст етган. Штатдаги ўн минглаб кишилар электр таъминоти ва ичимлик сувисиз қолган.
