DW хабарига кўра, WSJ 20 октябрда эълон қилган мақоласида Маск ва Трамп чекловларни телефон орқали муҳокама қилганини билдирган. Манбаларнинг айримлари суҳбат чеклов жорий этилганидан кейин бўлганини айтган. Бошқа бир манба эса ундан олдин ҳам мулоқот бўлганини таъкидлаган.
Айрим америкалик расмийларга кўра, Маск мустақил ҳаракат қилган ва Трамп Украинага нисбатан жавоб чоралари бўйича бевосита кўрсатма бермаган. Вазиятдан хабардор бошқа манба эса Маск чекловни киритишдан аввал маъмуриятнинг бир нечта юқори мартабали вакили, жумладан, Трамп билан маслаҳатлашганини билдирган.
Маск, SpaceX ва Оқ уй Reuters агентлигининг бу борадаги изоҳ сўровларига хабар эълон қилингунига қадар жавоб бермаган.
Киев юқори ҳаракат тезлигида алоқа узилаётганини айтмоқда
Украина президенти Володимир Зеленский 19 октябрда ҳарбийлар алоқа ва дронларни бошқариш учун фойдаланадиган Starshield тизими фронтда соатига 130–161 километр ҳаракат тезлигида ишлашдан тўхтаётганини билдирган.
Унинг сўзларига кўра, узилишлар Украина дронларидан фойдаланишни ҳам, Россия учувчисиз аппаратларини тутиб қолишни ҳам қийинлаштирмоқда. Бу ерда гап интернет тезлиги эмас, алоқа терминалини олиб юрган воситанинг ҳаракат тезлиги ҳақида бормоқда.
Украина Мудофаа вазирлиги чекловлар 14 октябрга ўтар кечаси пайдо бўлганини маълум қилган. Вазирлик 15 октябрда тизимнинг дала шароитидаги иши тикланганини билдирган бўлса-да, Зеленский кейинчалик юқори тезликдаги муаммолар сақланаётганини айтган.
Аввалги баёнотлар ва янги хабар ўртасидаги зиддият
The Telegraph 16 октябрда манбаларига таяниб, Starshield’ни чеклаш ғоясини Маск илгари сургани, Трамп уни қўллаб-қувватлаганидан сўнг Пентагон лимитлар жорий этганини ёзган эди.
Маск эса Starshield ишига оид чекловларни АҚШ ҳарбийлари ва якуний ҳисобда мамлакат президенти белгилашини таъкидлаган. Трамп ўзи бундай кўрсатма бермаганини ва Маск ҳам берган деб ўйламаслигини айтган.
17 октябрда АҚШ давлат котиби Марко Рубио ҳам Оқ уйдан тизимни секинлаштириш бўйича кўрсатма берилганини рад этган. У техник муаммолар бўлганини тан олган, аммо тизимдан фойдаланиш имконияти тикланганини билдирган.
