Давлат қарзи ва банкларга қарши. АҚШ Россияга нисбатан санкциянинг биринчи қисмини эълон қилди

Байденнинг айтишича, АҚШнинг бирламчи санкциялари Россия давлат қарзига қаратилган. Шунингдек, Россия ҳарбий тузилмасига хизмат кўрсатувчи «Роспромсвяз» ҳарбий банки ҳам санкцияга тушган. Байденнинг айтишича, тез орада Россия сиёсий элитасига қарши санкциялар пакети ҳам эълон қилинади.

АҚШ Молия вазирлиги Россияга қарши санкцияларнинг бир учини чиқарди. Унга кўра, Россия сиёсий элитаси вакилларининг фарзандлари ҳам санкцияга тушган. Хусусан, Россия ФХХ раиси Александр Бортниковнинг ўғли Денис Бортников, собиқ бош вазир Михаил Фрадковнинг ўғли Пётр Фрадков, президент администрацияси раҳбарининг биринчи ўринбосари Сергей Кириенконинг ўғли Владимир Кириенко «қора рўйхат»га тушган.

Шунингдек, Россиянинг «Промсвязбанк», «ВЭБ» банки ва уларга алоқаси бўлган 42 та шуъба компаниялар санкцияга тушган.

Жо Байден матбуот анжумани давомида Россия Украинага бостириб кирганини айтди: «Путин аввал Россияга тегишли бўлган ҳудудларга, жумладан ҳозирда демократия гуллаб-яшнаётган ва НАТО аъзоси бўлган давлатларга ҳам очиқчасига таҳдид қиляпти. Биз Россия билан қуролли тўқнашувга бормоқчи эмасмиз. Қилаётган барча ҳаракатларимиз мудофаага қаратилган. НАТОнинг ҳар бир қарич ерини ҳимоя қиламиз», деди Байден.

АҚШ президенти Германия билан «Шимолий оқим-2»ни тўхтатиб қўйиш бўйича ишлаётганини таъкидлади. Байден Украинага моддий ва ҳарбий ёрдам давом эттирилиши, Зеленский билан доимий алоқада бўлиб турганини айтди.

Олдинроқ Германия «Шимолий оқим-2» газ қувури сертификациясини тўхтатиб қўйганди. Бу эса Россия операторни ишга тушира олмайди дегани.