Сув хўжалиги объектларини бошқаришга хусусий сектор жалб этилади

Президентнинг «Қуйи бўғинда сув ресурсларини бошқаришни такомиллаштириш ҳамда сув истеъмолчилари орасидаги муносабатларни тартибга солиш чора-тадбирлари тўғрисида»ги қарори қабул қилинди.

Қуйи бўғинда сув ресурсларини бошқаришнинг устувор йўналишлари сифатида қуйидагилар белгиланди:

• қишлоқ хўжалиги маҳсулоти ишлаб чиқарувчилар ва аҳоли томорқаларини сув ресурслари билан ишончли таъминлаш;
• ирригация тизимлари ва суғориш тармоқларининг ҳамда улардаги гидротехника иншоотларини доимий техник соз ҳолатда ушлаб туриш;
• йирик қишлоқ хўжалиги маҳсулоти ишлаб чиқарувчиларни ўз ҳудудида сувни бошқариш ва тақсимлаш ишларига жалб қилиш;
• иқтисодиёт тармоқларини сув билан таъминлашга оид давлат функцияларини хусусий секторга ўтказиш бўйича ДХШ тамойилларини кенг жорий этиш;
• сувнинг ҳисоби ва ҳисоботини инсон омилига минимал равишда боғлиқ бўлган автоматлаштирилган тизимлар орқали юритиш.
• Ҳужжат билан қуйидаги тартиблар белгиланди:

қишлоқ хўжалиги ерлари ўз ҳисобида мавжуд бўлган кластерларга ўзларига тегишли майдонлардаги барча сув хўжалиги объектларини ДХШ тамойиллари асосида бошқарувга бериш;

• мева-сабзавотчилик ҳамда шоличиликка ихтисослашган туманлар сув хўжалиги объектлари бошқарувига ДХШ тамойиллари асосида хусусий секторни жалб қилиш;
• қишлоқ хўжалиги суғориладиган ерларида фаолият кўрсатаётган сув истеъмолчилари ва туман ирригация бўлимлари ўртасида сув етказиб бериш ва сув хўжалиги хизматларини кўрсатиш бўйича тўғридан-тўғри шартнома тузиш.

Сув хўжалиги объектлари ДХШ тамойиллари асосида берилганда, уларни ўз бошқарувига олган хусусий корхоналар хизмат кўрсатиш ҳудудида:

• мавжуд бўлган барча сув хўжалиги объектларини мустақил бошқаради;
• деҳқон хўжаликлари ва аҳоли томорқаларини белгиланган тартибда сув олиш лимити доирасида сув билан таъминлайди;
• сув ҳисоби ва ҳисоботининг тўлиқ юритилишини таъминлайди ҳамда бу жараёнга автоматлаштирилган тизимларни жорий қилади;
• хизмат кўрсатиш ҳудудидаги барча сув хўжалиги объектларининг босқичма-босқич модернизациясини таъминлайди.

Бунда, бириктирилган ҳудуддаги сув хўжалиги объектларининг эксплуатация харажатлари учун давлат бюджетида назарда тутиладиган маблағларнинг бир қисми хусусий шерикка тўлаб берилади.