Қашқадарёда тери-таносил касалликлари шифохонаси бош шифокори ва “Ўзагроинспекция” инспектори пора олаётганда ушланди

Шифокор маҳкумни манзил колониясига юбормаслик мақсадида унга нисбатан сохта касаллик варақаси очиш учун, “Ўзагроинспекция” инспектори эса фуқарога тегишли бўлган тракторга ҳужжат тўғрилаб бериш учун пул талаб қилган.

Қашқадарё вилояти прокуратурасининг хабар беришича, маҳкум А.Т.нинг мурожаатига асосан 2022 йил 3 март куни тезкор тадбир ўтказилган. Тадбирда вилоят тери-таносил касалликлари диспансери бош шифокори А.Х. маҳкумга нисбатан касаллик варақаси очиб, бир ой давомида манзил колониясига юбормаслик ва диспансерда олиб қолиш эвазига 500 минг сўмни пора тариқасида олган вақтида ашёвий далиллар билан ушланган.

Шунингдек, прокуратура департаменти ходимлари томонидан Нишон туманида 2022 йил 3 март куни тезкор тадбир ўтказилган. Тадбирда “Ўзагроинспекция” Нишон тумани бўлими катта инспектори Р.Ш. фуқаро О.Б.дан ўзига тегишли трактори учун техник ҳужжат расмийлаштириб бериш эвазига 3 миллион сўм талаб қилиб, шундан 1 миллион сўмни олдиндан олиб, қолган 2 миллион сўмни олаётган вақтда ашёвий далиллар билан қўлга олинган.

Қайд этилишича, мазкур ҳолатлар юзасидан вилоят прокуратураси томонидан ЖКнинг 210-моддаси (пора олиш) билан жиноят иши қўзғатилиб, дастлабки тергов ҳаракатлари олиб борилмоқда.

Қашқадарёда «нефтобаза» оператори терговчига 1300 доллар пора бераётганда ушланди