Финландия раҳбарияти НАТОга зудлик билан кириш масаласини қўллаб-қувватлади 

Финландия президенти Саули Ниинистё ва бош вазир Санна Марин НАТОга зудлик билан аъзо бўлиш масаласини қўллаб-қувватлади. Бу ҳақда пайшанба куни эълон қилинган уларнинг қўшма баёнотида айтилади.

«Финландия НАТОга аъзо бўлиш учун зудлик билан ариза бериши керак», дейилади мамлакат президенти ва бош вазири баёнотида. 

Шунингдек, улар яқин кунларда альянсга қўшилиш бўйича миллий даражада қадамлар қўйилишига умид билдирди.

«НАТОга аъзо бўлиш Финландия хавфсизлигини оширади. НАТОга аъзо бўлиш билан Финландия бутун мудофаа иттифоқини мустаҳкамлайди», - дейилади унда.
 
Май ойи бошида НАТО бош котиби Йенс Столтенберг Финландиянинг НАТОга аъзо бўлиш бўйича кутилаётган аризаси альянснинг Брюсселдаги қароргоҳида муҳокама қилинишини ва у ижобий кутиб олинишини айтган эди. 

Финландия парламентида бу масалани муҳокама қилиш апрель ойида бошланган. 

Агар аъзолик учун ариза топширилса, у аввало НАТО кенгаши томонидан кўриб чиқилади, шундан сўнг аъзолик келишуви альянснинг 30та давлатида миллий даражада ратификация қилиниши керак. 

Бундан олдин НАТО Швеция ва Финландиянинг ташкилотга тезлаштирилган тарзда киришига рухсат бермоқчи экани хабар қилинганди.

Финландияда, 9 май куни Yle радиостанцияси томонидан эълон қилинган тадқиқотга кўра, респондентларнинг 76 фоизи альянсга аъзо бўлиш тарафдори. Бу барча даврларнинг энг юқори кўрсаткичидир. Респондентларнинг 12 фоизи қарши овоз берди, яна 11 фоиз респондент жавоб тўғрисида қарор қабул қила олмади. Март ойида НАТОга қўшилиш қарорини мамлакат аҳолисининг 62 фоизи қўллаб-қувватлаган.