Ўзбекистонда аҳолини фавқулодда вазиятдан муҳофаза қилишга раҳбарлик қилиш бош вазир зиммасига юкланади

Президентнинг “Фавқулодда вазиятларнинг олдини олиш ва бартараф этиш ҳамда ёнғин хавфсизлигини таъминлашнинг жорий этилган тизими самарадорлигини янада ошириш тўғрисида”ги фармони лойиҳаси эълон қилинди.

Ўзбекистонда фавқулодда вазиятлар олдини олиш ва бартараф этиш ҳамда ёнғин хавфсизлигини таъминлашнинг сифат жиҳатидан янги тизими жорий этилиб, чора-тадбирлар амалга оширилгани қайд этилган.

Қуйидагилар фавқулодда вазиятлардан муҳофаза қилиш ва ёнғин хавфсизлигини таъминлаш соҳасидаги тадбирларни “маҳаллабай” даражада ташкиллаштириш асосий йўналишлари этиб белгиланади:

• биринчидан – фавқулодда вазиятлардан муҳофаза қилиш тизимига замонавий ахборот технологияларини татбиқ этиш орқали қуйи бўғинлар фаолиятини тўлиқ рақамлаштиришга эришиш;
• иккинчидан – фавқулодда вазиятлар олдини олиш, уларни бартараф этиш, ёнғин хавфсизлигини таъминлаш ва фуқаро муҳофазаси йўналишларида илмий тадқиқотлар ўтказиш ва инновацион ташаббусларни қўллаб-қувватлаш замонавий механизмларини жорий этиш;
• учинчидан – фавқулодда вазиятлар мониторинги ва прогнозлаш тадбирларини такомиллаштириш ҳамда табиий ва техноген хавфли жараёнлар ҳолати таҳлили асосида хавф манбаи юқори ҳудудлар, объектларда профилактик ва бошқа кечиктириб бўлмайдиган ишларни ташкил этиш;
• тўртинчидан – фавқулодда вазиятларни бартараф этиш кучлари шайлигини ошириш мақсадида замонавий техника ва асбоб-анжомлар билан жиҳозлаш ва тайёргарлигини халқаро стандартларга мувофиқлаштириш;
• бешинчидан – аҳоли ўртасида тарғибот-тушунтириш ишларини олиб боришнинг таъсирчан, креатив ва самарали услубларини ишлаб чиқиш ҳамда уларни ўз вақтида амалиётга татбиқ этиш чораларини кўриш;
• олтинчидан – ёнғин хавфсизлигини таъминлаш айрим функцияларини бажаришга хусусий сектор вакилларини жалб қилиш;
• еттинчидан – фавқулодда вазиятлар олдини олиш ва бартараф этиш ҳамда ёнғин хавфсизлигини таъминлашда жамоатчилик кенг иштирокини таъминлаш.

Қуйидагилар Фавқулодда вазиятлар вазирлигининг асосий вазифалари этиб белгиланади:

• табиий ва техноген хусусиятли фавқулодда вазиятлар олдини олиш ва уларни бартараф этиш, ёнғин хавфсизлиги, сейсмик кузатувлар, кичик ҳажмли кемалардан хавфсиз фойдаланиш, сув объектларида фуқаролар ҳаёти ва соғлиғини муҳофаза қилиш соҳасида давлат сиёсатини ишлаб чиқиш ҳамда амалга ошириш;
• табиий ва техноген хусусиятли фавқулодда вазиятлар олдини олиш ва уларни бартараф этиш, фуқаро муҳофазаси, ёнғин хавфсизлигини таъминлаш соҳасида инновацион технологияларни татбиқ этиш бўйича устувор йўналишларни белгилаш ва илмий-техник дастурларни тасдиқлаш;
• фавқулодда вазиятлар ва ёнғинлар юзага келиши ҳамда ривожланиши хавфини мониторинг қилиш ва прогнозлаш тадбирлари асосида улар вужудга келишини барвақт профилактика қилиш ва олдини олиш, зарарини камайтиришга қаратилган комплекс чора-тадбирларни ишлаб чиқиш ҳамда самарадорлигини баҳолаш;
• аҳолини, маҳаллабай аҳоли фаол қатламидан ташкил этилган гуруҳларни, мансабдор шахсларни ҳамда қутқарув ва фуқаро муҳофазаси кучларини фавқулодда вазиятларда ҳаракат қилишга тайёрлаш, қайта тайёрлаш ва малакасини ошириш тадбирларини ташкил этиш ва амалга ошириш;
• фуқаро муҳофазаси вазифаларини бажариш, фавқулодда вазиятлар ва ёнғинлар олдини олиш ва уларни бартараф этиш бўйича давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлар фаолиятини мувофиқлаштириб бориш;
• фавқулодда вазиятлар олдини олиш ва бундай вазиятларда ҳаракат қилиш давлат тизими фаолиятини, фуқаро муҳофазаси ва ёнғин хавфсизлиги тизимини ташкил этиш ва таъминлаш;
• ёнғин хавфсизлигини техник жиҳатдан тартибга солиш доирасида қурилиш, реконструкция, ихтисослаштирилаётган, кенгайтирилаётган ва техник жиҳозланаётган объектларда фавқулодда вазиятлар келиб чиқишини олдини олиш ҳамда ёнғин хавфсизлиги талабларига амал қилинишини таъминлаш;
• аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш, фуқаро муҳофазаси ҳамда ёнғин хавфсизлигини таъминлаш соҳасида халқаро ҳамкорлик қилиш.

Белгилаб қўйилишича, Фавқулодда вазиятлар вазирлигининг ўз ваколатлари доирасида қабул қилган қарорларини бажариш вазирликлар, идоралар, уюшмалар, муассасалар, ташкилотлар, мансабдор шахслар ва фуқаролар учун мажбурий ҳисобланади.

Фуқаро муҳофазаси ҳамда аҳолини ва ҳудудларни фавқулодда вазиятлардан муҳофаза қилишга раҳбарлик қилиш:

• Ўзбекистонда – Ўзбекистон бош вазирига;
• Қорақалпоғистон Республикаси, вилоятлар, шаҳарлар ва туманларда –Қорақалпоғистон Республикаси Вазирлар Кенгаши раиси ва тегишли ҳудудлар ҳокимларига;
• давлат ва хўжалик бошқаруви органлари, маҳаллий давлат ҳокимияти органлари, шунингдек, мулкчилик шаклидан қатъи назар барча ташкилотларда – улар биринчи раҳбарларига юкланади.