Брифингда Қорақалпоғистонда жорий этилган фавқулодда ҳолат даврида ҳудуднинг комендатураси томонидан амалга оширилган дастлабки ишлар ҳақида маълумот берилди.
«Барчангизга маълум, жорий йилнинг 1 июл куни Қорақалпоғистон Республикаси Нукус шаҳрида бир қанча одамлар кўчага чиқишгани бўйича хабарлар тарқалган эди. Шу куннинг ўзида жамоат тартибини сақлашга масъул бўлган Миллий гвардия ва ҳамкор вазирликлар бўлинмаларининг куч воситалари белгиланган тартибда сафарбар қилинди ва аҳоли ўртасида тушунтириш ишлари олиб борилди.
Фуқароларнинг қонунбузарлик ҳолатларига йўл қўймасликлари ва барча мурожаатлари ўрнатилган тартибда кўриб чиқилиши юзасидан тушунчалар берилди.
Фуқаролар ўртасида провокацион ташвиқотлар тарқатган ва ҳуқуқни муҳофаза қилувчи орган ходимларининг қонуний талабларига бўйсунмасдан фаол қаршилик кўрсатган айрим шахслар қўлга олинди», деган Миллий гвардия расмийси.
Маълум қилинишича, куни кеча президент Жўқорғи Кенгесга қилган мурожаатидан сўнг, ҳудуддаги вазият барқарорлашиб, ҳаёт ўз маромига қайтмоқда.
«Қорақалпоғистон Республикаси ҳудудида фавқулодда ҳолат амал қилиш даврида соат 21:00дан соат 7:00га қадар комендантлик соати белгиланди ва Миллий гвардия қўмондони, генерал майор Рустам Жўраев комендатура бошлиғи этиб тайинланди ҳамда ўз-ўзидан Фавқулодда ҳолат тўғрисидаги Конституциявий қонунда назарда тутилган барча ваколатлар юклатилди.
Ҳудуд комендантининг буйруғи асосида куч воситалари ҳамда тезкор штаб фаолияти йўлга қўйилди ва жорий этилган фавқулодда ҳолат режимини таъминлаш назоратга олинди.
Фавқулодда ҳолат режимини таъминловчи давлат идораларининг фаолиятини мувофиқлаштириш учун ҳудуд коменданти раҳбарлигида фаолияти йўлга қўйилган тезкор штабда аҳолига турли масалалар бўйича ёрдам кўрсатиш мақсадида ишчи гуруҳлар ташкил этилди.
Фармонда белгиланган фавқулодда чоралар ва вақтинчалик чекловлар таъминланмоқда. Хусусан, жамоат тартибининг ўта муҳим ва тоифаланган объектларни ҳамда аҳолининг ҳаёт фаолиятини таъминловчи инфратузилма объектларининг муҳофазаси кучайтирилди», деган у.
Қорақалпоғистон Республикаси ҳаракатланиш эркинлиги, шу жумладан, транспорт воситалари учун чекловлар ўрнатилган. Жисмоний шахсларнинг шахсини тасдиқловчи ҳужжатлари текширилиши, уларнинг шахсий кўрикдан ўтказилиши ва улардаги ашёлар, транспорт воситаларининг кўздан кечирилиши йўлга қўйилган.
Қорақалпоғистон Республикасига кириш ва чиқиш чекланган. Юридик шахслар фаолиятини тўхтатиб туриши ёки тугатишига қаратилган иш ташлашлар ва бошқа ҳар қандай ишлар тақиқланган.
