Қозоғистоннинг Ўзбекистондаги элчиси Дархон Сотиболди Туркистон вилояти ҳокими этиб тайинланди.
![](https://storage.kun.uz/source/8/38zWDpHm9wx7lKmq02nKNJiE5h7icO-T.jpg)
Дархон Сотиболди / Фото: Қозоғистон элчихонаси
26 август куни Туркистон вилояти ҳокими Умирзоқ Шукеев ўзига бўйсунувчи Кентау ҳокими ўта йирик миқдорда пора олганликда айбдор деб топилгани сабабли истеъфога чиққан эди. 31 август куни Қосим-Жўмарт Тўқаев Шукеевнинг истеъфосини қабул қилди.
Дархон Сотиболди 2019 йилнинг март ойидан буён Қозоғистоннинг Ўзбекистондаги элчиси лавозимида ишлаб келаётган эди.
У 1974 йил 26 мартда туғилган, Сейфуллин номидаги Оқмўла қишлоқ хўжалиги институтини, шунингдек, Қозоғистон гуманитар юридик университетини тамомлаган. Мутахассислиги - иқтисодчи-менежер, ҳуқуқшунос.
Маълумот учун, Дархон Сотиболди ўрнига Қозоғистоннинг Ўзбекистондаги дипломатик ваколатхонаси раҳбари этиб ким тайинланиши ҳозирча номаълум.