«Роснефт»нинг Германиядаги активлари мусодара қилинди

Россиянинг «Роснефт» компаниясининг Германия ҳудудидаги активлари мусодара қилинди. Бу ҳақда Германия иқтисодиёт ва иқлимни муҳофаза қилиш вазирлиги хабар берди.

Хабарда айтилишича, федерал ҳукумат Rosneft Deutschland GmbH (RDG) ва RN Refining & Marketing GmbH (RNRM) корхоналарини федерал тармоқ агентлиги ишончли бошқарувига ўтказди.

«Федерал тармоқ агентлиги Rosneft Deutschland ҳамда PCK, MiRo ва Bayernoil нефтни қайта ишлаш заводлари устидан назорат ўрнатди», — дейилади хабарда.

Вазирликнинг маълумот беришича, Германиядаги барча нефтни қайта ишлаш заводларининг 12 фоизга яқини «Роснефт»га тегишли.

Апрел ойида Gazprom Germania немислар бошқарувига ўтказилганди. Германия иқтисодиёт вазири Роберт Ҳабек компанияни тўлиқ миллийлаштиришга чақирган, бироқ канцлер Олаф Шолц бунга рози бўлмаганди.