Финландия россиялик сайёҳларнинг киришини тақиқлайди

Финландия яқин орада Россиядан келган сайёҳлар, шу жумладан бошқа Шенген давлатларидан визага эга бўлганлар учун мамлакатга ташриф буюришни тақиқлайди. Финландия ҳукумати ташқи ишлар ва хавфсизлик сиёсати бўйича вазирлар маҳкамасидаги муҳокамадан сўнг шундай қарорга келди ва «яқин кунларда» у мамлакат ҳукумати томонидан тасдиқланади, деб хабар берди Yle нашри 23 сентябр, жума куни Финландия ташқи ишлар вазири Пекка Ҳаавистога таяниб. 

Финландия ТИВ раҳбарининг сўзларига кўра, Россия фуқаролари мамлакатга фақат инсонпарварлик, ўқиш, ишлаш ва қариндошлариникига бориш билан боғлиқ ҳолда ташриф буюриши мумкин бўлади. Россияликларга, агар улар ушбу мамлакат томонидан берилган Шенген визаси билан Европа иттифоқи бошқа давлатига «транзитда» бўлса ҳам, киришга рухсат этилмайди. Шу билан бирга, чегарачилар Россия фуқароларига илгари берган кўп марталик Финландия визаларини бекор қилишлари мумкин бўлади. 

Бундан ташқари, мамлакатда кўчмас мулкка эга бўлган россияликларга Финландияга киришга рухсат бериладиган қоидалар кучайтирилади. Амалдорнинг қайд этишича, руслар виза олиш учун Финландия кўчмас мулкини «бирлаштириб» сотиб олишган, аммо янги чора-тадбирлар бу усул билан курашишга қаратилган. 

Ҳаависто таъкидлашича, Полша, Латвия, Литва ва Эстония 19 сентябрь куни россиялик сайёҳларнинг киришини тақиқлаганидан сўнг, Финландия ва Норвегия Россия билан қуруқликдаги чегараси очиқ бўлган Европа иттифоқи ва Шенгеннинг ягона аъзоларига айланди, шунинг учун Финландия россиялик сайёҳлар учун «транзит мамлакат»га айланиш хавфи бор. 

Россия президенти Владимир Путин мамлакатда сафарбарлик эълон қилгани сабабли россияликларнинг четга чиқиб кетиши оқими ҳам ортди. Финландия чегара хизмати маълумотларига кўра, 23 сентябр куни Россияда чиқиш рейслари учун авиачипталар танқислиги юзага келганидан сўнг, Россия-Финландия чегарасида Россиядан чиқиб кетишни хоҳловчиларнинг бир ярим километрлик навбати пайдо бўлган. 

Гарчи Европа иттифоқининг баъзи давлатлари сафарбарлик ва Украинага қарши урушда иштирок этишдан қочган Россия фуқароларига гуманитар визалар бериш ғоясини қўллаб-қувватламаса-да, бир қатор немис сиёсатчилари уларга бошпана беришни таклиф қилишди. 

Бироқ, ташаббус муаллифлари қатор тегишли нюансларни келтирди. Биринчидан, ҳарбий хизматдан қочганлардан чақирув ёки ҳарбий гувоҳнома каби ҳарбий хизматга чақирилиш ёки дезертирлик фактини тасдиқловчи ҳужжат тақдим этиш талаб қилинади. Иккинчидан, Германия нуқтайи назаридан хавфсиз бўлган мамлакатлар (бутун Европа иттифоқини ўз ичига олади) орқали Германияга кирган бошпана изловчилар у ерда ҳимоя сўраш тавсияси билан ушбу мамлакатларга қайтарилиши мумкин.