Жиззахда содир бўлган ЙТҲда “Пахта-2022” назорат текширув постига хизматга кетаётган ИИБ ходими ҳалок бўлди

Профилактика инспектори “ВАЗ 2106” билан Жиззах-Гагарин автомобил йўлида ҳаракатланиб кетаётганида машинанинг ўнг томони шиналари техник шикастланган ва йўл четга ағдарилиб кетган.

ИИВ матбуот котиби Шохруҳ Ғиёсовнинг Kun.uz’га маълумот беришича, 2022 йил 2 октябрь куни кеч соат 24:00 ларда Жиззах вилояти Зарбдор тумани ҳудудидан ўтган йўлда содир бўлган йўл-транспорт ҳодисасида ИИБ ходими ҳалок бўлган.

Зарбдор тумани «Мустақиллик» МФЙ профилактика инспектори лейтенант Х.Шукруллаев ўз бошқарувидаги “ВАЗ 2106” машинаси билан 4Р-38 Жиззах-Гагарин автомобил йўлининг 10-километрида ҳаракатланиб кетаётганида машинанинг ўнг томони шиналари техник шикастланган.

Шундан сўнг машина бошқарувни йўқотиб, йўлнинг ўнг томонидаги дала-майдони четига ағдарилган. Оқибатда, оғир тан жароҳатлари олган профилактика инспектори воқеа жойида ҳалок бўлган.

Дастлабки суриштирувда аниқланишича, шу куни Х.Шукруллаев ҳушёр ҳолатда, хизмат кийимида бўлиб, вилоят ИИБ бошлиғи фармойишига асосан, “Пахта-2022” тадбирлари муносабати билан Зарбдор тумани, Янгикент маҳалласида ташкил этилган назорат текширув постига тунги хизматга кетаётган бўлган.

Қайд этилишича, ҳолат прокуратура органлари томонидан текширилмоқда.