Россиянинг Белгород областида поездлар ҳаракати тўхтатилди

Россиянинг Белгород областида темирйўл яқинига қулаган ракета парчалари туфайли Новоосколский туманида поездлар ҳаракати тўхтатилди. Вилоят губернатори Вячеслав Гладковнинг сўзларига кўра, 14 октябр, жума куни эрталаб ҳаво ҳужумидан мудофаа тизимлари Новий Оскол ҳудудида бир нечта ракеталарни уриб туширган. Бўлаклар темирйўл яқинига тушиб, электр узатиш линияларига зарар етказган.

«Фавқулодда вазиятлар гуруҳларини кутмоқдамиз. Ишончим комилки, улар вазиятни тезда ўнглаб, йўл ҳаракати тикланади. Мен сизни хабардор қилиб тураман. Энг муҳими, жабрланганлар йўқ», - деб ёзди Гладков Telegram-каналида. 

Охирги 24 соат ичида Белгород областида бир қатор ҳодисалар рўй берди, маҳаллий ҳокимият уларни Украинадан ракета ҳужумлари билан боғлаяпти. Бир кун аввал Вячеслав Гладков Украина Қуролли кучлари Белгородни ўққа тутгани, натижада 16 қаватли турар жой биноси томининг бир қисми қулаб тушганини айтганди. 

Бундан ташқари, губернаторнинг сўзларига кўра, Украина Қуролли кучлари Шебекинодаги божхона постини, шунингдек, Красное Шебекинское қишлоғини ўққа тутган. Кечқурун Октябрский қишлоғида отишма натижасида ўқ-дорилар омбори портлатилган. 

Украина томони Белгороднинг ўққа тутилиши ҳақида хабар бермади. Одатда, Украина Россия ҳудудини Украина қўшинлари томонидан эҳтимолий ўққа тутилиши ҳақида расман изоҳ бермайди. Уруш бошланганидан бери Белгородда бир нечта портлашлар содир бўлди, бу Украинанинг ўққа тутилиши натижасида содир бўлган. Портлашлардан бирида бир неча киши ҳалок бўлди.