Ижтимоий тармоқларда бекатда метро поезди тўхтаб қолгани ҳақида хабарлар тарқалганидан сўнг «Тошкент метрополитени» АЖ расмий изоҳ берди.
Маълум қилинишича, соат 08:22 да 1985 йилда ишлаб чиқарилган 69-сонли ҳаракат таркибида техник носозлик кузатилган.
Йўловчилар туширилганидан кейин поезд техник кўрикдан ўтказиш учун махсус йўлакка олиб кетилган. Хизмат кўрсатишда узилишларга йўл қўймаслик мақсадида зудлик билан йўналишга захира поезди чиқарилган.
Метрополитен ҳолат юзасидан тегишли техник чоралар кўрилганини билдириб, йўловчилардан юзага келган ноқулайлик учун узр сўраган.
