Шойгу НАТОнинг тўрт давлати мудофаа вазирлари билан гаплашди. У Украина гўёки «ифлос бомба» (радиологик қурол) портлатмоқчи эканини айтмоқда. Лекин бунга ҳеч қандай далил келтирмаган. Украинлар жавоб қайтаришди.
РФ мудофаа вазири Сергей Шойгу 23 октябр куни телефон орқали Ғарбнинг бир неча мамлакатлари - Франция, Туркия, Буюк Британии ва АҚШ мудофаа вазирлари билан телефон орқали мулоқот қилди. Шойгу уларнинг ҳар бири билан Украинадаги «назорат қилиб бўлмайдиган даражада кучайиб кетишга мойил бўлган вазият»ни муҳокама қилган
РФ мудофаа вазирлиги хабар қилишича, Франция, Туркия ва Буюк Британиядаги ҳамкасблари билан музокаралар чоғида Шойгу «Украина томонидан „ифлос бомба“ қўлланган ҳолда провокациялар амалга оширилиши эҳтимоли юзасидан ўз хавотири»ни билдирган. РФ мудофаа вазирлиги бу версияни асословчи ҳеч қандай далил келтирмаган. Россия ҳарбий идорасининг Пентагон билан музокаралар тўғрисидаги хабарида россияликлар вазири мулоқот чоғида «ифос бомба» мавзусини кўтаргани борасида аниқ гап келтирилмаган.
Шойгунинг музокараларидан бироз олдинроқ РИА Новости «Киев режими Украинада „ифлос бомба“ билан провокация тайёрлаётгани» тўғрисида хабар берганди. Россия давлат агентлиги бунда «турли мамлакатлардаги ишончли манбалари», жумладан Украинадаги манбасига таянган ҳолда хабар тарқатган. Агентликнинг тасдиқлашича, провокация гўёки Россияни оммавий қирғин қуроли қўллашда айблаш ва «бу орқали дунёда Москвага нисбатан ишончга путур етказишга қаратилган кучли аксилроссия кампаниясини бошлаш» учун тайёрланмоқда. РИА Новости хабарида «ифлос бомба» гўёки Украинада тайёрланаётгани, Киев эса «ядро қуроли таркибий қисмлари Украинага тақдим этилиши масаласида» алоқада бўлиб тургани айтилган. Бу маълумот бошқа мустақил манбалар орқали тасдиқланмаган.
Буюк Британия мудофаа вазири Бен Уоллес Сергей Шойгуни эскалацияни янада кучайтириш учун баҳона сифатида бу каби баёнотлардан фойдаланмасликка чақирган. Буюк Британия мудофаа вазирлиги Россия томони ташаббуси билан ташкиллаштирилган мулоқот тафсилотларини келтиради.
Вазир Шойгу Украина Ғарб давлатлари, жумладан Буюк Британия кўмагида Украинадаги можарони кучайтиришга қаратилган ҳаракатни режалаштираётганини иддао қилди. Мудофаа вазири [Бен Уоллес] бу айбловни рад этди ва бу каби баёнотлар эскалация учун баҳона сифатида фойдаланилмаслиги кераклигидан огоҳлантирди.
Буюк Британия мудофаа вазирлиги хабарида таъкидланишича, икки вазир ҳам мулоқот чоғида ўзини «профессионал тутган ва ўзаро ҳурмат сақлаган».
Ўз навбатида Туркия мудофаа вазирлиги Туркия мудофаа вазири Хулуси Оқар суҳбат чоғида Сергей Шойгуга Анқара минтақада барқарорликни тиклашда ёрдам кўрсатишга тайёрлигини айтганини маълум қилган. «Томонлар минтақада вазиятни янада чуқурлаштириши мумкин бўлган эҳтимолий провокациялар қаршисида огоҳликни сақлаш зарурлигини қайд этди», — дея Туркия мудофаа вазирлигига таянган ҳолда ёзади Anadolu.
Украина ҳукумати «ифлос бомба» ҳақидаги хабарларни ёлғон деб атади. «Россиянинг Украина гўёки „ифлос бомба“дан фойдаланишни режалаштираётгани ҳақидаги ёлғонлари бемаънилик билан бир қаторда, хавфли ҳамдир», — деди Украина ташқи ишлар вазири Дмитро Кулеба. У Украина ядро қуролларини тарқатмаслик тўғрисидаги шартнома иштирокчиси ҳисобланиши ва унга содиқ эканини қайд этган. «Бизда „ифлос бомба“лар йўқ ва биз бундай нарсага эга бўлишни режалаштирмаганмиз... Россияликлар кўпинча ўзлари режалаштирган нарсада бошқаларни айблайди», — деган Кулеба.
Украина президенти офиси раҳбари маслаҳатчиси Михайло Подоляк ҳам Украинанинг Liga.net нашрига берган интервьюсида Шойгунинг сўзларига муносабат билдириб, шундай деган: «Бу сурбетлик билан ёлғон гапирса, бунга кимдир ишонади, деб ўйлайдиган субъектлар ижросидаги мутлақо ва бутунлай кутилган бемаънилик». Подоляк шунингдек твиттерида «ҳеч қандай „ифлос бомба“ йўқлиги, фақат россияликларнинг яққол кўриниб турган геноцидини янги фейклар орқали оқлашга бўлган ифлос уринишлар борлиги»ни таъкидлаган.
Украина президенти Володимир Зеленский 23 октябр куни охиридаги анъанавий тунги видеомурожаатида Украинада «ифлос бомба»ни фақат Россия қўллаши мумкинлигини айтди.
Россия қаерга бормасин, ҳамма жойда ўзидан кейин оммавий қабрлар, зиндонлар, вайрон бўлган шаҳар ва қишлоқлар, миналанган ерлар, йўқ қилинган инфратузилма ва табиий офатларни қолдиради. Ва агар кимдир Европанинг бизга тегишли қисмида ядровий қуролдан фойдаланиши мумкин бўлса, бу қайси субъект экани аниқ ва бу субъект Шойгуга барча вазирларга қўнғироқ қилиб, Украина нимагадир тайёрланаётганини айтишни буюрган. Бу фақат бир нарсани билдиради: Россия аллақачон ҳамма нарсани тайёрлаб қўйган.
Ҳисоблайманки, энди дунё имкон қадар кескин муносабатда бўлиши керак. Агар Россия ставкани яна бир поғонага кўтариш ва навбатдаги кескинлаштирувчи қадамни ташлашга тайёрланаётган бўлса — у ҳозирнинг ўзида ўзининг исталган янги «ифлослиги»га дунё кўз юмиб қараб турмаслигини билиши керак.
Бу Россия томонидан сўнгги вақтларда Украина манзилига билдирилган биринчи айблов эмас. 18 октябр куни Россиянинг Украинага босқинига қўмондонлик қилувчи Сергей Суровикин Украина Херсон областининг босиб олинган ҳудудида жойлашган Каховка ГЭС тўғонига ёппасига ракета зарбалари беришни режалаштираётганини айтганди. Америкадаги Урушларни ўрганиш қилиш институти Россия, катта эҳтимол билан, Каховка ГЭС дамбасига зарар етказиб, бунда Украинани айблашга тайёрланаётганини тахмин қилди. Шундан кейин Украина президенти Володимир Зеленский Киев ҳукуматидаги маълумотларга кўра Россия ҳарбийлари Каховка ГЭС дамбасини миналагани ҳақида айтди.
