IT-мутахассиси Адам Калинин (исм-шарифи хавфсизлик юзасидан ўзгартирилган) сафарбарлик ҳақида эшитиб, ваҳимага тушиб қолади.
Калинин Россиянинг Украинага босқинига қарши бўлган ва урушга қарши норозилик акцияларида иштирок этган. Унга бунинг учун жарима ва бир неча кунлик қамоқ жазоси ҳам тайинланган.
Калинин чақирув қоғози келишини кутмасликка қарор қилади. У икки ҳамкасби каби Россиядан кетишни хоҳламайди (бунга тайёр эмасди) ва ўрмон томон йўл олади.
«Менинг кўзим олдида икки вариант гавдаланди: биринчиси мен дўконга бораман ва ўша ерда қўлимдан тортиб ҳарбий комиссариатга олиб кетишади, иккинчиси мен ноқулай шароитларда яшашга тўғри келувчи ўрмонга кетаман ва озод бўлиб қоламан», — дейди Калинин.
Унинг сўзларига кўра, яқинлари бу қарорини қўллаб-қувватлаган. Ўрмонга кўчиш учун тайёргарлик деярли бир ҳафта давом этган. Адам сўнгги йилларда тез-тез сайрларга чиқиб турган ва шу боис унда бу борада тажриба ва керакли анжомлар – бензопила, оддий арра, болта, модем ва антенна бор эди.
Фақатгина қуёш батареяларини сотиб олишга тўғри келди.
Калинин ўрмонда иккита палатка қурди. Биттаси қуёшли, шамолсиз, интернетсиз, қулай жойдан (ухлаш учун), иккинчисини (ишлаш учун) биринчисидан уч дақиқалик масофада шамолли, лекин интернет ишловчи ноқулай жойда тиклайди. У бу палаткасини «ўз офиси» дея атаган.
Калинин ўрмондаги ҳаёти ҳақида ўзининг «Логичный лесник» телеграм каналида ёзиб боради. Одатда у тонгги соат еттида, қушлар сайрашни бошлаганда уйғонади. Нонуштани эса бир соатлик йўл босиб,
рафиқаси ёрдами билан ташкил қилган егулик захирасидан олиб келади.
«Мен шунчаки чиқинди контейнери сотиб олдим. У катта, анча арзон ва мен бу ерга олиб келган барча нарсалар — консерва, доширак, чой, қаҳва, шакарни сиғдира олади», — дейди у.
Адам овқатни композит газ баллони ва горелка ёрдамида пиширади. Овқат пишириш ва ичиш учун ёмғир сувидан фойдаланади.
Калинин ҳафтасига беш кун, кунига саккиз соат ишлайди. Қолган вақтда у «уйи»нинг таъмири билан шуғулланади. Унда қурилиш бўйича тажриба йўқ, лекин You Tube ва бирор «жиддийроқ нарса»: палатка эмас, қандайдир уйча қуриш истаги бор.
