Тошкентда Шароф Рашидовнинг ташқи сиёсий фаолиятига бағишланган фотокўргазма ташкил этилди

 “Шароф Рашидов – сиёсатчи ва дипломат” деб номланган фотокўргазмада собиқ иттифоқ даврида Ўзбекистонга қарийб чорак аср раҳбарлик қилган Шароф Рашидовнинг ташқи сиёсий фаолияти акс этган. Жумладан, бу ерда давлат арбобининг 1950–1983-йиллардаги расмий ва хориж сафарларида олинган ноёб ҳамда кам учрайдиган фотосуратлари намойиш этилган.

Тошкент шаҳар ҳокимлиги ахборот хизматининг маълум қилишича, фотокўргазманинг очилиш маросимида сенаторлар, таниқли олимлар, маданият, санъат намоёндалари, зиёлилар ва кенг жамоатчилик вакиллари, шунингдек, Шароф Рашидов билан ҳамнафас бўлган, ҳозир пенсияда бўлган тарихчи олимлар, сиёсатшунослар, фахрий журналистлар иштирок этишган.

Суратларнинг бирида Шараф Рашидовни Кубанинг афсонавий етакчиси Фидел Кастро билан кўриш мумкин. Фотосурат Кастронинг 1963 йил май ойида собиқ иттифоққа ташрифи чоғида олинган.

Фотокўргазмадан Шароф Рашидовнинг Эрон шоҳи Муҳаммад Ризо Паҳлавий билан Тошкентда (1957 йил), Миср президенти Жамо Абдуносир Ҳусайн билан (1958 йил), Вьетнам етакчи Хо Ши Мин билан (1959 йил), Мозамбикнинг илк президенти Саморп Мойзеш Машел билан (1981 йил), шунингдек, Африка ва ЛОтин Америкасидаги кўплаб мамлакатларнинг лидерлари ва ушбу мамлакатларда яшовчи оддий одамлар билан бирга тушган суратлари ҳам ўрин олган.