Ниинистё: Финландия ядро қуролини жойлаштиришни режалаштирмаяпти

Финландия НАТОга аъзо бўлганидан кейин ўз ҳудудида ядро қуролини жойлаштиришни режалаштирмаяпти, деди мамлакат президенти Саули Ниинистё. «Альянсга қўшилганидан сўнг Финландия ўз ҳудудига ядро қуролини олиб кириш ниятида эмас ва уни финларга кимдир таклиф қилаётгани ҳақида ҳеч қандай аломат йўқ», — деди у 7 ноябрь, душанба куни журналистларга.

Ядро қуроли НАТОнинг тийиб туриш стратегиясининг муҳим қисмидир ва шунинг учун «ўз-ўзидан мақсад эмас, қандайдир ҳодисанинг олдини олиш воситасидир», дея унинг сўзларидан иқтибос келтирган Yle. Унинг қўшимча қилишича, ядровий урушда ғалаба қозониб бўлмайди, шунинг учун у ҳеч қачон бошланмаслиги керак.

Бундан ташқари, Финландия президенти тинчликка эришиш ва одамларнинг қурбон бўлишини тўхтатиш учун Москва билан алоқани давом эттиришга ҳаракат қилишга чақирди ҳамда Франция президенти Эммануэл Макрон ва Германия канцлери Олаф Шолцнинг тегишли қадамларини қўллаб-қувватлади. Украинадаги урушнинг охири ҳали кўринмаяпти, ҳеч бир томон ўзининг дастлабки позициялари бўйича муросага келмаяпти, дея қўшимча қилди у. Ниинистё Украина ўз ҳудудий яхлитлигини ҳимоя қилиш ҳуқуқига эга эканлигини, Россия эса қўшни давлатга бостириб кириш ҳуқуқига эга эмаслигини таъкидлади.

Шу билан бирга, у Финландиянинг Шимолий Атлантика иттифоқига қўшилиш жараёни айнан қачон содир бўлиши мумкинлигини аниқлаштирмади ва бу «оқилона вақт ичида» якунланишини айтди. Ниинистё, шунингдек, унинг мамлакати Анқара талаблари туфайли ўз позициясини ўзгартирмаслигини билдирди. Финландия Туркия ҳукумати томонидан танқид қилинган курд ташкилотларига ёрдам берди ва бу фаолиятни давом эттиради, дея қўшимча қилди у.

Швеция ва Финландия 2022 йилнинг баҳорида Россиянинг Украинага ҳарбий бостириб кириши муносабати билан анъанавий бетарафликдан воз кечди ва НАТОга аъзо бўлиш учун ариза топширди. Альянс икки давлатни НАТОга қабул қилиш тартибини июнь ойида, Анқара Швеция ва Финландиянинг иттифоққа қўшилишига қарши эътирозларини қайтариб олганидан сўнг бошлаган эди. Туркия Ҳелсинки ва Стокҳолмдан 2016 йилги давлат тўнтаришига уринишда гумон қилинган курдлар экстрадициясини талаб қилди.

Кейинроқ Туркия президенти Ражаб Тоййиб Эрдўған Швецияни бу ваъдаларни бажармасликда айблади. 5 ноябрь куни Швециянинг янги ҳукумати курдларни НАТОга қўшилиш учун қўллаб-қувватлашдан бош тортиши маълум бўлди. Стокҳолм Туркиянинг НАТОга аъзоликка розилигини олиш учун Суриядаги курд исёнчиларидан узоқлашмоқда, деди Швеция ташқи ишлар вазири Тобиас Билльстрём. Ноябрь ойи бошида НАТОга аъзо 30 та давлатдан 28 таси Финландия ва Швецияни қабул қилишга рози бўлди. Ҳужжатлар альянснинг барча аъзолари томонидан ратификация қилинганидан сўнг, иккала давлат ҳам НАТО Низомининг 5-моддаси билан ҳимояланади, у эса жамоавий мудофаа тамойилини белгилайди.