Андижон вилояти Хўжаобод туманидаги «Нави гул» МЧЖга тегишли 100 гектар майдонда гулкарам ва брокколи карами етиштирилиб, хорижга экспорт қилинмоқда.
Корхона ўзига ажратилган ердан унумли фойдаланиш учун йил давомида икки марта ҳосил олишни йўлга қўйган. Дастлабки ҳосилда помидор ва булғор қалампири етиштирилса, такрорий экин сифатида гулкарам ва брокколи карами экилмоқда.
«Етиштирилган ҳосил буюртмага кўра қадоқланиб ёки шундайлигича қўшни давлатларга экспорт қилинмоқда. Маҳаллий бозорда ҳали бу сабзавотларга талаб у қадар юқори эмаслиги учун савдога деярли чиқармаяпмиз. Далаларимизда март-апрел ойларида эртанги помидор ва булғор қалампири етиштирсак, такрорий экинда карамларни етиштирмоқдамиз. Бу жараёнда эса 500–600 нафар маҳаллий аҳолини мавсумий иш билан таъминлаганмиз», – дейди «Нави гул» МЧЖ директори ўринбосари Эркинжон Ёқубов.
Бир гектар ердан 50 тонна карам олинмоқда. Келгусида карамлар бошқа давлатларга ҳам экспорт қилиниши режалаштирилмоқда.
Абдували Қурбонов, Kun.uz мухбири.
