Наманган шаҳрида Усмон Носир номидаги хиёбон очилди

Наманган шаҳрида ўзбек халқи атоқли фарзанди, шоир Усмон Носир таваллуди 110 йиллиги кенг нишонланди, деб хабар бермоқда «Дунё».

Фото: Наманган вилояти ҳокимлиги

Президентнинг 2022 йил 10 февралдаги «Оташин шоир, таржимон ва драматург Усмон Носир таваллуди 110 йиллигини кенг нишонлаш тўғрисида»ги қарори ижроси доирасида шоир ҳайкали ва унинг номи билан аталган хиёбон очилди.

Наманган вилояти марказидаги эски гузарлардан бирида Усмон Носир онаси - Холамбиби билан яшаган хонадон аниқланиб, ушбу маҳаллага Усмон Носир номи берилди. Наманган шаҳридаги кўчалардан бирига ҳам шоир номи берилди. Янгидан қад ростлаган 22-сонли умумтаълим мактабига ёндош алоҳида музей ва кутубхона барпо қилинди.

Вилоят ҳокимлиги кўмаги билан шоир жияни Нодира Рашидованинг анча йиллардан бери китобхонларга ҳавола этилмай келинган «Усмон Носир» романи икки жилдлик китоб ҳолида нашр қилинди. Ўзбекистон Журналистлар уюшмаси аъзоси, фахрий журналист Раҳим Ирисовнинг «Ўзбекнинг Лермонтови», «Шеърият дийдасида қотган ёш» китоблари чоп этилди.

Наманган шаҳрининг Ҳуррият кўчасида, Заҳириддин Муҳаммад Бобур номидаги маданият ва истироҳат боғи атрофида Усмон Носир хиёбони бунёд этилди.

#Наманган #Усмон Носир