Соғлиқни сақлаш вазирлиги янги йил байрами арафасида пақилдоқлар мавсуми бошланиб кетганига эътибор қаратиб, унинг оқибатларидан огоҳлантирди.
«Қонуний тақиқларга қарамай, бундай маҳсулотларни сотишга уринаётганларнинг ягона дарди — пул ишлаш.
Ўйинқароқ болалар-у ўсмирлар эса пиротехниканинг ўзи ва ён-атрофдагиларга зиёнидан етарлича хабардор эмас», дейилади хабарда.
Тиббиёт ходимларининг огоҳлантиришича, бундай воситаларнинг бехосдан қаттиқ пақиллаши кишиларни чўчитиб, юрак-қон томир тизимига ўта салбий таъсир кўрсатади. Ушбу ҳолат фожиали ўлим билан ҳам якун топиши мумкин.
- Юз, кўз, қўл соҳаларида оғир куйиш жароҳатлари;
- кўзлар шикастланиши ва кўриш фаолияти қисман ёки бутунлай бузилиши;
- жароҳат асорати билан боғлиқ пластик операцияларга муҳтожлик, куйган соҳаларда дағал чандиқлар;
- қўл бармоқлари соҳаларида контрактуралар ҳосил бўлиши «пақилдоқ» ва салютларнинг салбий оқибатларидир.
Пиротехника воситалари шовқинидан қаттиқ қўрқиш туфайли:
- руҳий бузилиш;
- сурункали асаб ва қон-томир тизими касалликлари;
- қандли диабет;
- ҳомилага зиён етиши эҳтимоли юқори.
«Яқин масофада пиротехника пақиллашидан инсон баротравма ва акустик жароҳатлар олиб, карлик ёки умрбод қулоқ шанғиллаши (тиннитус) касаллигига йўлиқиши мумкин.
Шу боис, Соғлиқни сақлаш вазирлиги ота-оналар ва жондан азиз фарзандларимизни яна бир бор эҳтиёткорликка чақиради», дейилади вазирлик хабарида.
