Аргентина ва Франция бугун жаҳон чемпионатининг финал ўйинида майдонга тушишади. Тўрт йилликнинг энг муҳим ўйини олдидан футболчиларнинг жисмоний ҳолати бўйича саволлар юзага келди. Масалан, французлар таркибида Марокашга қарши яримфинал ўйинини Адриен Рабио ва Деотшанкюл Юпамекано ўтказиб юборишганди. Хабар қилишларича, мазкур футболчилар грипп аломатлари туфайли ўзларини ёмон ҳис қилишган.
«Доҳада ҳарорат бироз пасайди, кондиционерлар эса ҳамон ёқиқ, ҳамиша эҳтиёткор бўлиш керак. Бизда бир неча грипп аломатлари билан касалланиш ҳолатлари бор. Кондиционерлардан фойдаланиш ҳам вирус тарқалишига таъсир кўрсатиши мумкин.
Юпамекано Англия билан ўйиндан кейиноқ ўзини ёмон ҳис қила бошлади. Бу зўриқиб ишлаганда ва бунинг оқибатида тана заифлашганида, вирусларни юқтиришга мойил бўлиб қолганингизда содир бўлади», — деганди Франция бош мураббийи Диде Дешам.
Фото: CLIVE MASON/GETTY IMAGES
Кўп ўтмай французлар жамоаси сафида яна бир футболчи касаллангани маълум бўлди. 14 декабр куни Марокашга қарши ўйин олдидан жамоа вингери Кингсли Команда дармонсизланиш аломатлари кузатилган. Натижада у майдонга чиқмаган ва жамоадошлар билан кечки овқатга ҳам тушмаган, пайшанба куни Франция жамоасининг тикланиш бўйича машғулотларида иштирок этмаган.
«Пайшанба куни эрталаб Команда ҳам безовталик кузатилди. Ҳозир грипп мавсуми, вирус тарқалиб кетмаслигига ишонч ҳосил қилиш учун барча зарур эҳтиёт чораларини кўрмоқдамиз. У, албатта, касалланган, аммо биз қўлимиздан келганини қиламиз. Биз Команни жамоадан алоҳида қилдик. Аммо бизда кейинги ўйинга қадар бир неча кун бор ва у якшанба кунги ўйинга тайёр бўлиши керак», деди мураббий.
Аммо жума кунига келиб муаммолар кўпайди: икки марказий ҳимоячи – Рафаэл Варан ва Иброҳим Конатеда ҳам касаллик аломатларини ҳис қила бошлашди. Яримфинал ўйинида айнан улар марказий ҳимоя жуфтлигини ҳосил қилишганди.
ОАВда французлар жамоасида «туя гриппи» тарқалгани эҳтимоли ҳақида хабарлар тарқалган. Бу халқаро номланиши Яқин Шарқ респиратор синдроми (MERS) бўлиб, буюк британиялик мутахассислар инфекция Қатардаги жаҳон чемпионати старт олиши билан тарқала бошлагани ҳақида маълум қилишган. Вирус инсонга ҳайвондан ўтади, туялар эса асосий бўғин ҳисобланади. У илк бор 2012 йилда Саудия Арабистонида аниқланган. Ўтган вақт ичида бутун дунё бўйлаб 2600 та ҳолат тасдиқланган ва шундан қарийб минг бемор вафот этган. Бу грипп аломатлари: иситма, томоқдаги оғриқ, қуруқ йўтал ва бўғилиш. Шунингдек қорин оғриғи, кўнгил айниши ёки ич кетиши кузатилиши мумкин. Аммо, Mirror нашри қайд этишича, французлар жамоаси вакиллари бундай жиддий касаллик билан боғлиқ бўлмаган оддий грипп юқтириб олишган.
