Ўзбекистон ва АҚШ теннисчилари Дэвис Кубогида беллашади

Ўйинлар Тошкент шаҳрида ўтказилади.

3-5 феврал кунлари Тошкентда теннис бўйича Ўзбекистон ва АҚШ миллий жамоалари ўйинлари ўтказилади.

Миллий жамоалар норасмий жаҳон чемпионати ҳисобланган Дэвис Кубоги саралаш босқичи доирасида ўзаро тўқнаш келади. Ғолиб жамоа сентябр ойида ўтадиган Дэвис Кубогининг финал босқичига йўл олади.

Учрашувнинг илк кунида иккита яккалик баҳси, иккинчи куни эса битта жуфтлик, учинчи кунида иккита яккалик баҳси ўтказилади.

Ўзбекистон миллий жамоасини мамлакатнинг иккинчи рақамли ракеткаси Денис Истомин сардор сифатида кортга бошлаб тушади. Таркибдан шунингдек, Сергей Фомин, Ҳумоюн Султонов ва Санжар Файзиев ҳам жой олган.

АҚШ миллий жамоаси сафида Томми Пол, Женсон Бруксби, Макдоналд Маккензи, Ражив Рам ва Остин Крайчик келиши кутилмоқда.

Таққослаш учун, ATP рейтингида Томми Пол 32-, Бруксби 48-, Макдоналд 63-ўриндан жой олган бўлса, Фомин 362-, Истомин 468-, Султонов 489-, Файзиев эса 1178-поғонани эгаллаб турибди.

Жуфтлик баҳсларида иштирок этадиган Ражив Рам жуфтликлар рейтингида 3-, Крайчик эса 10-ўринда қайд этилган.

#АҚШ #Денис Истомин #Ўзбекистон #Теннис