Украина: отиб ташланган аскарнинг шахси ҳали якуний тарзда аниқланмади

Украина Қуролли кучлари қуролсиз украиналик аскарнинг қатл этилгани бўйича терговни давом эттирмоқда, унинг видеоси аввалроқ интернетда пайдо бўлган эди. Ҳарбий хизматчининг шахси ҳали якуний аниқланмаган, деб хабар қилди Украина Қуролли кучларининг «Север» ҳудудий мудофаа кучлари бошқармаси 9 март, пайшанба куни. «Бугунги кунга келиб биз ушбу видеодан Украина Қаҳрамонининг шахси аниқлангани ҳақидаги тахминларни на тасдиқлай, на инкор эта олмаймиз», — деб ёзади бошқарма Facebook’да. 

Украина Қуролли кучлари расмий терговнинг тўлиқ якунланишини кутишга ва муддатидан олдин хулоса чиқармасликка чақириб, аввалги баёнот фақат марҳумнинг яқин қариндошлари ва ҳамкасбларининг баёнотларига асосланганини таъкидлади. 

Бир кун аввал ўша бўлинма ўлган деб тахмин қилинган аскар номини кўрсатган ҳолда баёнот тарқатди. У Черниҳив вилояти ҳудудий мудофааси 119-алоҳида бригадасининг 163-батальони жангчиси Александр Мациевский эди, дейилади қўмондонлик хабарида. Унга кўра, 30 декабрь куни Мациевский тўрт нафар ҳарбий хизматчи билан биргаликда Соледар яқинида Россия кучларига қарши жангга кирган, шундан сўнг улар билан алоқа узилган.

Бундан ташқари, Александр Мациевскийни видеода онаси, ўғли ва ҳамкасблари таниб қолган. «Суспильне» телеканали Мациевскийнинг онаси Параска Демчук билан суҳбатни эълон қилди. Марҳумнинг жасади Россия ва Украина ўртасида ўликларни алмашиш доирасида қариндошларига топширилган, улар унинг шахсини аниқлаган.