• Киевда Украина раҳбарияти ва Европадаги иттифоқчиларнинг Доналд Трампнинг махсус элчилари Стив Уиткофф ва Жаред Кушнер бошчилигидаги АҚШ расмий делегацияси билан уч босқичли музокаралари бўлиб ўтди. Учрашувлар чоғида урушни тугатиш, қишда қилинажак ёрдам ва хавфсизлик кафолатлари муҳокама қилинди, деди Володимир Зеленский. Музокараларда Европадан Франция, Буюк Британия ва Германия вакиллари иштирок этган.
  • Томонлар уруш қишгача тугамаслигини тан олишган. Зеленский «уруш барибир қишгача давом этадиган бўлса», Америка ва Европа ёрдамига умид қилишини билдирган. Ўз навбатида, Трампнинг элчилари Зеленский ва унинг жамоасига қишгача тинчлик музокараларида олдинга силжишга эришиш мумкинлигини айтишган.
  • АҚШ ярим йил олдин бўлиб ўтган уч томонлама музокаралар форматига қайтмоқчи. Украина, Россия ва АҚШ делегациялари иштирокида навбатдаги уч томонлама учрашув ҳақида «яқин вақт ичида» эълон қилиниши мумкин, дея умид билдирди Уиткофф. «Ўйлайманки, биз Москвада сезиларли ютуқларга эришдик. Янги ғояларни эшитдик», – дея қўшимча қилди у. «Президент Трамп ва Стив [Уиткофф] билан биргаликдаги вазифамиз – „тинчлик пакети“ни яратишдир», – деди Кушнер. Унинг сўзларига кўра, АҚШ президенти эътиборни «узоқ муддатли тинчлик қуриш мумкин бўлган асосларни яратиш»га қаратган.
  • Зеленский Украина жанг майдонидаги позицияларини кучайтиргани, бу унга келажакдаги муҳокамаларнинг ҳар қандай форматида ишончлироқ бўлиш имконини беришини айтган. У уч томонлама учрашувлар бўлиб ўтиши учун ҳамма нарсани қилиш кераклигини таъкидлаган. «Кўрамиз, Россия нимага кўнаркан», – дея қўшимча қилди у.
  • FT манбаларига кўра, Трампнинг элчилари Киевга «ўзгарган вазиятларни ҳисобга олган ҳолда» аввалги ҳужжатларнинг қайта ишланган «янгиланган версиялари»ни олиб келишган. Бироқ, янги ғоялар кам, асосий масала эса Донбасс устидан назорат бўлиб қолмоқда. Зеленский ҳам уни тинчлик музокараларидаги асосий нуқталардан бири деб атади. «Бу фақатгина Донбасс масаласи эмас. Мен буни уруш масаласи, деб ҳисоблайман», – деди у.
  • Уиткофф сафарни «ажойиб» деб атаган. Унинг сўзларига кўра, Америка делегацияси Киев ва Москвадаги музокаралар натижаларидан «катта қониқиш ҳосил қилган». Зеленский Уиткофф ва Кушнернинг Украинага ташрифини «муҳим ва сермаҳсул» деб атади. «Бугун пойтахтда бўлган фуқароларимиз учун Patriot тизимларидан ҳам яхшироқ ишладингиз. Тез-тез келиб туринг ва бу одамларимизга жон сақлаш имкониятини беради», – деган у.