BBC бошловчиси сиёсий твит туфайли эфирдан четлаштирилди

Шанба куни Гари Линекернинг телевидениедаги кўплаб ҳамкасблари Буюк Британия миллий жамоаси футболчисининг 11 март куни бошпана тўғрисидаги қонун лойиҳасини танқид қилган твитидан сўнг BBC'нинг Match of the Day спорт шоусидан четлаштирилганига норозилик билдиришди. Уларнинг дастурлари модераторсиз ўтди ёки видеоёзувлар билан алмаштирилди.

7 март куни Буюк Британияда ички ишлар вазири Суэлла Браверманнинг сиёсий бошпана бериш бўйича янги қонун лойиҳаси тақдимоти бўлиб ўтди. Ҳужжат лойиҳаси, бошқа нарсалар билан бир қаторда, Буюк Британия чегараларини ноқонуний кесиб ўтган муҳожирларни ўз ватанларига ёки хавфсиз учинчи мамлакатларга, масалан, Руандага, кейинчалик Буюк Британияга киришга бир умрлик тақиқ билан чиқариб юборишни ўз ичига олади.

Шунда, Линекер ўзининг Twitter саҳифасида ушбу қонун лойиҳаси «энг заифларга қарши қаратилган шафқатсиз сиёсат» эканлигини ёзди. Шу билан бирга, у қонун лойиҳасида қўлланилган ибора 1930-йилларда Германияда янграган гапларга ўхшаш деган фикрни билдирди.

10 март куни кечқурун BBC расмийлари Гари Линекер «ижтимоий тармоқлардан фойдаланиш бўйича келишувга эришилмагунча» эфирга чиқмаслигини маълум қилди. Телерадиокомпания вакиллари ўз позицияларини Линекер, уларнинг фикрича, оммавий-ҳуқуқий ОАВ учун мажбурий бўлган сиёсий бетарафлик тамойилини бузгани билан асослашди.