Украинада икки америкалик фуқаро ҳалок бўлди

Фото: Andrew Kravchenko / AP

Яна икки америкалик фуқаро Россия билан урушда Украина томонида жанг қилаётганда ҳалок бўлди, деб ёзади Daily Beast.

АҚШ Давлат департаменти нашрга уларнинг исмларини айтмасдан, қурбонларнинг қариндошлари билан алоқада эканлигини тасдиқлади.

Россиялик ҳарбий блогерларнинг таъкидлашича, ҳалок бўлган кўнгиллиларнинг биринчиси Уолтер Уитон бўлган, шундай исмли одамнинг қариндоши Daily Beast мухбири билан телефон орқали суҳбатда Уолтернинг ўлими фактини тасдиқлади, аммо бошқа маълумот беришдан бош тортди.

Украинадаги урушда ҳалок бўлган иккинчи АҚШ фуқароси Грэди Курпаси бўлиб, бу ҳақда беш кун олдин GoFundMe веб-сайтида унинг қариндошлари томонидан яратилган маблағ йиғиш кампанияси саҳифасида айтилади.

Улар Курпасининг дафн маросими ва унинг ўлими билан боғлиқ бошқа харажатлар учун пул йиғишмоқда.