Қашқадарёдаги «метан заправкада» Nexia-2 портлаб кетди

Машинага газ қуйилаётганда унинг баллони портлаган. Nexia-2 яроқсиз ҳолга келган, бир киши жароҳатланган.

Фото: Ижтимоий тармоқлар

Вилоят Фавқулодда вазиятлар бошқармасининг хабар беришича, ҳодиса бугун, 2023 йил 6 май куни соат 09:30 ларда Муборак тумани «Кончилар» МФЙ ҳудудида жойлашган «Автогаз» автомобилларга газ қуйиш шохобчасида содир бўлган.

Nexia-2 машинасининг баллонига газ қуйиш вақтида портлаш содир бўлган. Оқибатда машина яроқсиз ҳолга келган. Ҳодиса жойида ёнғин содир бўлмаган.

Машина яқинда бўлган бир нафар фуқаро енгил даражада тан жароҳати олган ва зудликда туман тиббиёт бирлашмасига юборилган.

Қайд этилишича, ҳозирда, ҳолат бўйича тегишли соҳа вакиллари томонидан суриштирув ишлари олиб борилмоқда.