Сенат раисининг биринчи ўринбосари ЕХҲТ ДИИҲБ сайловни кузатиш миссияси раҳбари билан ўзаро алоқаларни янада чуқурлаштириш масалаларини муҳокама қилди.
Сенат раисининг биринчи ўринбосари Содиқ Сафоев Европада хавфсизлик ва ҳамкорлик ташкилоти Демократик институтлар ва инсон ҳуқуқлари бўйича бюросининг (ЕХҲТ ДИИҲБ) сайловни кузатиш миссияси раҳбари Урсула Гачек билан учрашди.
Парламент юқори палатаси маълумотига кўра, мулоқот чоғида қонун ижодкорлиги жараёнини такомиллаштириш соҳасида ЕХҲТ ДИИҲБ билан ҳамкорликни чуқурлаштириш, бўлажак Ўзбекистон президенти сайловига тайёргарлик кўриш ва уни ўтказиш масалалари юзасидан фикр алмашилди.
Бўлажак сайлов мамлакатда амалга оширилаётган кенг кўламли ислоҳотларга доимий тус беришда муҳим аҳамият касб этиши таъкидланди.
Мамлакатда сайлов қонунчилиги ва сайловларни ташкил этиш механизмларини такомиллаштириш бўйича тавсияларни амалга оширишда самарали ҳамкорликни давом эттиришга келишиб олинди.
Томонлар сайлов қонунчилигини демократлаштиришнинг турли жиҳатлари бўйича ҳамкорлик ва ўзаро алоқаларни янада чуқурлаштиришга тайёр эканини қайд этди.
