Қирғизистонликлар Ўзбекистонга дори воситаларини олиб ўтиш учун контрабанда каналини ташкил қилган

Қирғизистон фуқаролари рецепт бўйича сотиладиган дори воситаларини контрабанда йўли билан Ўзбекистонга олиб чиқиш билан шуғулланган. Бу ҳақда Қирғизистон Миллий хавфсизлик давлат қўмитасига таяниб 24.kg хабар берди.

Қайд қилинишича, Қадамжой тумани, Марказ қишлоғида яшовчи қирғизистонлик Р.С.Г. махсус хизмат ходимларига 9 минг 600 пластинка «Зардекс» (Ҳиндистонда ишлаб чиқарилган) дори воситасини ўз ихтиёри билан топширган. Унинг Ўзбекистон қора бозоридаги нархи 288 минг доллар (қарийб 3,3 млрд сўм) экани айтилмоқда.

«Контрабанда канали ташкилотчиси Г.И.Н. яшаш жойида ўтказилган тинтув вақтида «Тропикамид» препарати (кўз томчилари) олиб қўйилди. Зарар миқдори қарийб 5,9 млн қирғиз сўмини (778 млн сўм) ташкил этди. Қўлга киритилган гиёҳванд моддалар рухсатномасиз Қирғизистонга олиб кирилган. Уларни Ўзбекистонга жўнатишмоқчи эди. Фуқаро Г.И.Н. вақтинчалик сақлаш изоляторига жойлаштирилди», дейилади хабарда.